Төрийн хошой шагналт зохиолч Дашзэвэгийн Сэнгээгийн мэндэлсний 100 жилийн ойгоор төрсөн нутагт нь хүрэл хөшөө босгож нээлээ. "Тагтаа" шүлгийг хүн бүр цээжилж өссөн, "Хөрсөн доор нь эрдэнээр арвин, Хүний хэрэгцээ цөм багтсан..." гээд "Эх орон" дууг нь мэднэ, "Аюуш" тууж, "Өвгөн партизаны яриа" байна. Москвад Горькийн сургууль төгсөөд, Монголын Зохиолчдын Хорооны даргаар ажиллаж байсан гээд Сэнгээ зохиолч арвин намтартай. Зохиолч З.Баттулга, сэтгүүлч И.Гүрринчен нар энэ сумынх. Хоёулаа манай Дарханд ажиллаж бүтээж байсан. Зохиолч Д.Мягмарыг энд төрснөөр заримдаа бичсэн байх боловч Баруунбүрэн сумынх гэцгээдэг.
Зохиолчийн хөшөөг уран барималч Р.Энхтайван урлажээ. Тэр энэ нутгийнх. Хөшөөний нээлтэд Ардын уран зохиолч Б.Бааст, Соёлын Гавъяат зүтгэлтэн зохиолч Х.Зандраабайдий хоёр ирж оролцон дурсамжаа хуваалцлаа. Сэнгээг сайн мэдэх цөөхөн ахмадын хоёр нь энэ. Зохиолчийн ойг тэмдэглэж, хөшөөг нь босгох үйлсийг нутгийн уугуул академич Л.Болд санаачилж Нутгийн Зөвлөлийн дарга Г.Занданхүү, "Монгол Дээвэр" Барилгын компаний захирал Д.Алтангэрэл нар тэргүүлэн өрнүүлжээ. Хөшөөг нээхэд Чех улсад амьдардаг зохиолчийн хүү С.Эрдэмбилэг, ач хүү Э.Манлайн хамт ирж оролцлоо. "Тагтаа" дуугаар нь Ардын жүжигчин Ч.Мөнхшүр ая өргөж зочин гийчид нутгийнхан түрэн дууллаа.
Ө.РАГЧААСҮРЭН / ДАРХАН-УУЛ АЙМАГ /
