Өвөрхангай аймгийн Хархорин сумын “Долоон бургас” гэдэг газар өчигдөр өдрийн 16:12-16:25 цагт орсон усархаг бороо, хүчтэй салхины улмаас Хархорины 110 кВт-ын цахилгаан дамжуулах агаарын шугамын 7 тулгуур багана, Архангай аймгийн Хашаат, Хотонт сумдад 35 кВт-ын 20 тулгуур багана, нийт 27 цахилгаан дамжуулах агаарын шугамын тулгуур багана унажээ.
Үүний улмаас Архангай аймгийн 14, Баянхонгор аймгийн 20, Булган аймгийн 6, Дундговь аймгийн 2, Өвөрхангай аймгийн 16, Хөвсгөл аймгийн 3, Төв аймгийн 4, нийт 7 аймгийн 65 сум цахилгаангүй болсон тухай мэдээллийг ОБЕГ-т ирүүлсэн байна. Мэдээллийн дагуу Хангайн бүсийн “Цахилгаан дамжуулах үндэсний сүлжээ” ТӨХК-ийн харъяа Улаанбаатар, Архангай, Баянхонгор, Орхон, Өвөрхангай аймаг, Хархорин сумаас нийт засварын 6 бригадын 68 хүн, 19 техник хэрэгсэлтэйгээр ажиллаж, одоогийн байдлаар Булган, Дундговь, Төв аймгуудын 12 сумын цахилгааныг өгч, хэвийн ажиллагаанд оруулжээ.
Харин одоогоор дөрвөн аймгийн 53 сум цахилгаангүй байгаа юм байна.
