Өнгөрсөн хаврын түймэрт Дорнод аймгийн Сэргэлэн сумын олон айл өрх хашаа хороо, мал ахуйгаа алдаж, нутаг бэлчээрийн талаас илүү хувь нь түймэрт шатсан. Түймэр, зуны гандуу, намар цас эрт орсон зэргээс үүдээд тус сумын нутгийн 37 хувь нь бэлчээрийн доройтолд ороод байна.
Цаашид цас нэмж орвол дээрх хүндрэлүүдээс үүдээд өвөлжилт хүндрэх вий гэж нутгийнхан санаа зовниж буйгаа ярьж байлаа. Одоогоор баг хооронд 35, өөр сумын нутагт 38 өрх оторлож байгаа. Сумын ард иргэд 4780 тн өвс, 18 тн хивэг бэлтгэсэн бол сумын нөөцөнд 114 тн өвс, 22 тн хивэг базаажээ. Сумын нөөцийн өвс тэжээлээ 12 дугаар сарын сүүлээс малчиддаа үнэгүй тарааж эхлээд байна.
Хаваржилт хүндэрч болзошгүй учир нөөцийн өвс тэжээлээ 36 тн-оор нэмэгдүүлж, мөн хүн эмнэлгийн автомашин шаардлагатай байна гэдгээ сумын Засаг дарга танилцуулж, энэ асуудлаа аймаг орон нутагтайгаа хамтраад шийдэхийг Шадар сайд үүрэг болголоо. Харин Онцгой комиссоос Сэргэлэн суманд 22 тн өвс, 11 тн хивэг өглөө. Cэргэлэн сум нутаг бэлчээрийн талаас илүү нь түймэрт шатаж бэлчээрийн доройтолд ороод байгаа учраас цаашид цас их орвол өвөлжилт хүндэрч болзошгүй юм.
А.ЦЭРЭНДУЛАМ
