.JPG)
Гадаадаас ажиллах хүч авдаг компаниуд монгол ажилчдыг чадавхжуулах ажил огт хийдэггүй. Энд ажиллахаар ирж байгаа гадаад ажилчдын дийлэнх нь мэргэжлийн ур чадвар шаардсан ажил хийж байгаа юм. Гэвч гадаадаас ажиллах хүч авч байгаа компаниуд гадаад ажилчдын ур чадварыг монгол ажилчдад эзэмшүүлэх хууль огт хэрэгжихгүй байна.
Өнгөрсөн оны байдлаар Дорнод аймгийн 19 компани 1258 гадаад ажиллах хүчин авч ажиллуулжээ. Ихэвчлэн уул уурхай, газрын тосны чиглэлд үйл ажиллагаа явуулдаг компаниуд гадаад ажилчдыг захиалан авсан байна. Дорнод аймагт ирж ажиллаж байгаа гадаад ажилчдын 90-95 хувийг БНХАУ-ын иргэд эзэлж байгаа юм. Гадаад ажилчид инженер техникийн болон удирдах албан тушаалд голчлон ажиллаж байгаа бол монгол ажилчид туслах ажлыг хийж гүйцэтгэж байна. Энэ тохиолдолд гадаадын ажилчдын мэргэжлийн ур чадварыг монгол ажилчдад эзэмшүүлэх, монгол ажилчдыг чадавхжуулах ажил хийгдэхээр гэрээнд тусгагдсан байдаг боловч энэ ажил орхигдсоор л байна.
Гадаад ажиллах хүч авч ажиллуулдаг компаниудын өнгөрсөн жилийн гэрээг дүгнэж энэ онд хийгдэх гэрээг нэлээд үр өгөөжтэй байх тал дээр анхаарлаа хандуулж ажиллахаа илэрхийллээ. Ер нь Дорнод аймагт гадаад ажиллах хүч авч ажиллуулж байгаа компаниудын 70 орчим хувь нь гадаадын хөрөнгө оруулалттай газрууд байна. 2016 онд шинээр ажилд зуучлагдсан иргэдийн 50 орчим хувь нь гадаадын хөрөнгө оруулалттай компанид ажил орсон байна. Нэг ёсондоо гадаадын хөрөнгө оруулалттай компани ажлын байрны дийлэнх хувийг бүрдүүлж байна.
ДОРНОД АЙМГААС А.ИЧИНХОРЛОО МЭДЭЭЛЛЭЭ
