.JPG)
УИХ-ын Хууль зүйн байнгын хороо, ХЗДХЯ хамтран Зөрчлийн тухай хуулийн шинэчилсэн найруулгын төслөөр өнөөдөр Хууль зүйн үндэсний хүрээлэнд хэлэлцүүлэг зохион байгууллаа. Хэлэлцүүлэгт УИХ-ын гишүүн Х.Нямбаатар, ХЗДХ-ийн Дэд сайд Б.Энхбаяр, УЕПГ-ын хяналтын Прокурор Г.Оюунболд болон холбогдох албаны хүмүүс оролцсон юм. Уг хуулийн шинэчилсэн найруулгын төслийн үзэл баримтлал, агуулга ач холбогдлын талаар УИХ-ын гишүүн Х.Нямбаатар, Дэд сайд Б.Энхбаяр, “Зөрчлийн тухай хуулийн онолын үндэслэл, бусад орны туршлага” сэдвээр Г.Оюунболд нар илтгэл тавьж, хэлэлцүүлэг өрнүүллээ.
ХЗДХ-ийн сайд Б.Энхбаяр хэлэхдээ “Нэгдүгээрт, хуулийн техник бичилтийн хувьд зөрчлийн шинжүүдийг нэг өгүүлбэрт багтаагаад биччихсэн. Энэ нь өөрөө хянан шийдвэрлэхэд нэлээд төвөгтэй байдал үүсгэсэн байсан. Жишээлбэл, хориглосон газар согтууруулах ундааны зүйл хэрэглэсэн , мансуурсан бол торгоно гэж байгаа. Согтуурсан, мансуурсан үйлдэлд тус тусад нь болгож, заагласан. 2015 онд батлагдсан Эрүүгийн хуулиас Зөрчлийн хууль руу шилжсэн ганцхан үйлдэл байгаа. Энэ нь бусдын бие мах бодит гэмтэл учруулахгүйгээр халдах, гэдсэнд нь цохих, түлхэх зэрэг үйлдэл байдаг. Үүнийг гэмтэл учраагүй юм чинь заавал гэмт хэрэгт тооцоод байх шаардлага байхгүй. Зөрчилд тооцоод торгоод явчихдаг байхаар оруулсан байгаа. Зөрчлийн хуулийн торгох шийдвэрийн хувьд шууд тодорхой байх юм. Өөрөөр хэлбэл сонгох санкци байхгүй. Жишээлбэл, гудамж талбайд нус цэрээ хаясан үйлдэлд 10.000 төгрөгөөр торгоно. Түүнээс 5.000-10.000 төгрөг торгоно гэсэн интервал байхгүй” гэсэн юм.
Эх сурвалж : ХЗДХЯ
