Өнөөдөр төрийн ордон, гадна талбай болох Сүхбаатарын талбайд сенсаци дүүрэн өдөр болж өнгөрлөө. УИХ-ын чуулганы хуралдаан дээр Монголын социал, демократ намын дэд дарга Д.Энхзаяа Төрийн ордонд дунд хуруугаа гарган танхайрч, гадна талбайд Төрийн өмчийн бодлого зохицуулалтын газрын дарга Ц.Ням-Осор ярилцлага өгч байх зуур дэргэдүүр өнгөрч явсан иргэн "Ард түмэн ядарч байна за юу" гэж хэлээд салаавч үзүүлж, товч бөгөөд тодорхой хариулт өгч сошиал ертөнцөд нэлээд "сенсаци" дэгдээгээд амжлаа.
Мөн түүнээс гадна УИХ-ын гишүүн Д.Дамба-Очир байнгын хорооны хуралдаан дээр нэлээд халмаг, согтууруулах ундаа хэрэглэсэн байхдаа үг хэлж олон хүний анхаарлыг өөртөө татаад авсан. Түүнийгээ өөрөө тайлбарлахдаа "Даралт ихэссэн учир тийм байдалд орсон" гэж товчхон тайлбар өгсөн.
Ийм байдалтай байж төр түшилцэнэ гэж юу байх вэ. Хөл толгой нь мэдэгдэхгүй болсон энэ үед ёстой л эмх замбараагүй байдал ар араасаа хөвөрсөөр байна. Эр эм, хөгшин залуу, ихэс дээдэс гээд дураараа дургиж, дунд чөмгөөрөө жиргэнэ гээчийн үлгэр болж байна даа.
Ч.БЯМБАА
