Нийслэлийн мэргэжлийн хяналтын газрын дэд бүтцийн хяналтын хэлтсийн хамт олон, шинэ хашаа байшин барьж, бага насны 7 хүүхэдтэй өрх толгойлсон эмэгтэйн гэр бүлд бэлэглэжээ.
Уг сайн үйлийг тус хэлтсийн улсын байцаагч Т.Батцэнгэл гэх залуу санаачилсан байна. Тэрээр байшин барих төсөл бичиж барилгын болон бизнесийн нэлээд олон байгууллагуудад уриалга илгээсэн аж. Уг уриалгадаа заавал мөнгө гэхгүй барилгын материал ч байсан болно гэжээ.
Харин шинэхэн байшингийн эзэн Д.Солонго “Энэ мэдээг сонсоод маш их баярласан. Манайх Дорнод аймгийн Чойбалсан хотын айл. Хотод орж ирээд 16 жил болж байна. Би 7 хүүхэдтэй. Харин нөхөр маань өнгөрсөн жил самранд явна гэж гараад л эргэж ирээгүй, хорвоогийн мөнх бусыг үзсэн. Тогтсон ажилгүй болохоор гэр бүлээ тэжээхийн тулд хар бор ажил хийдэг байсан юм” гэлээ.
Төслийн багийнхан Солонгын Сонгинохайрхан дүүрэг дэх гэрийг нүүлгэж, шинэ байранд нь оруулсан юм. Түүний энэхүү шинэ байшин 56 метр квадратт талбайтай, гал тогоотойгоо нийлээд 3 өрөө, ханан пийшинтэй тохилог байр байв.
О.НАНСАЛМАА
