Чуулганы нэгдсэн хуралдаанд СЕХ-ны дарга Содномцэрэн, Төрийн байгуулалтын байнгын хорооны дарга Н.Энхболд нар үг хэлэв. Тэд сонгуулийн дүнг танилцуулж, сонгогчдын 50,7 хувийн санал авч ялалт байгуулсан Х.Баттулгын бүрэн эрхийг баталгаажуулж өгөхийг УИХ-ын гишүүдээс хүсэв. Үг хэлсэнтэй холбогдуулан УИХ-ын гишүүн А.Сүхбат:
- Сонгууль хуулийн хүрээнд шударга, булхайгүй боллоо гэж СЕХ-ны дарга Содномцэрэн хэллээ. Мөнгө тараасан, бие биенээ дайрч доромжилсон, гүтгэсэн, хууль зөрчсөн сонгууль боллоо. Маш бохир сонгууль боллоо. 2020 онд УИХ, 2021 онд Ерөнхийлөгчийн сонгууль болно. Дахиад ийм сонгууль хийх үү? гэж асуулаа. Мөн сонгуулийн хууль, Үндсэн хуульд өөрчлөлт оруулах шаардлага тулгарсан асуудалд УИХ-ын гишүүн Ж.Мөнхбат, Г.Занданшатар нар мөн СЕХ-ны дарга Содномцэрэнгээс тайлбар хүсэв. Төрийн байгуулалтын Байнгын Хорооны дарга Н.Энхболд,
- Үндсэн хуулийн өөрчлөлтийн хэлэлцүүлгээ эрчимжүүлэх учиртай. Үндсэн хуульд нэмэлт өөрчлөлт оруулсны дараа Сонгуулийн хуульд өөрчлөлт оруулахыг чухалчилах ёстой. Гадаадын ажиглагчид олноор ирсэн. Тэдний анхаарлыг нэг зүйл татсан. Сонгуулийн хуулинд гажиг байгааг тэд ажигласан. Сонгуулийн хуулийг зөрчиж болдог юм байна. Хууль зөрчсөн хүн нэр дэвшиж болдог юм байна. Энэ ойлгомжгүй хуулийг цаашид сайжруулах шаардлагатай гэж ажиглагчид үзсэн. Ингэж төрийн байгуулалтын байнгын хорооны дарга Н.Энхболд тодотголоо.
Ц.ХИШГЭЭ