Мексикийн төв нутгийн Морелос мужид есдүгээр сарын 19-ны өдөр 7.1 баллын хүчтэй газар хөдлөлт болжээ. Орон нутгийн засаг захиргааны бүртгэлээс үзвэл газар хөдлөлтийн улмаас 120 гаруй хүн амиа алдсан байна. Мексикийн газар хөдлөлтийн үндэсний төвийн мэдээнд тэмдэглэснээр орон нутгийн цагаар 13 цаг 14 минутад 57 километрийн гүнд газар хөдөлжээ.
Одоогоор аврах ажил үргэлжлэж байгаа бөгөөд нас барсан хүний тоо нэмэгдэж магадгүй байгаа аж. Энэ удаагийн газар хөдлөлтөд Мехико хотын барилга байгууламж дайвж, газар хөдлөлт хүчтэй мэдрэгдсэн тул оршин суугчид талбайд цугларан аюулаас сэргийлсэн байна.
Газар хөдлөлтийн дараа Мехико хотын олон улсын нисэх онгоцны буудал нисэх онгоц хөөрч газардахыг түр зогсоож, барилгын байдалд хяналт шинжилгээ хийсэн ба одоогоор хэвийн ажиллаж байгаа талаар Синьхуа агентлаг мэдээлжээ.
