Хаянхярвааг намын даргад биш өөр албан тушаалд сойж байсан байдаг. Түүнийг ерөнхийлөгчийн сонгуульд М.Энхболдыг ялмагц УИХ-ын даргаар өргөмжлөхөөр зэхэж байсан нь нэгэнт нууц зүйл биш болжээ. Харин намын даргад Эрдэнэбатыг дэвшүүлэхээр зэхэж байсан хөтөлбөр нь нурсан. Тиймээс өөр сонголт хийхэд хүрсэн. Ерөнхийлөгчийн сонгуульд ялагдсан учир намын даргад өрсөлдөх нь тун зохимжгүй гэдэг дүгнэлтийг М.Энхболд өөртөө хийсэн байна. Өрсөлдвөл хүчтэй өрсөлдөгч болно гэдэгтээ ч эргэлзэхгүй байгаагаа ойр тойрныхондоо дуулгажээ. Тэгэхээр нам доторхи ялалтын төлөөх тэмцэлд Хаянхярвааг сойжээ.
Хотынхноос гадна, хөдөө орон нутгийн гишүүдийн саналыг ч авах магадлал өндөртэй гэж тооцсон байна. Дээр нь УИХ дахь МАН-ын бүлгийн дарга хийж байгаа нь ч намын даргад өрсөлдөхөд дэм болох албан тушаал ч гэж үзжээ. Ирэх долоо хоногт эхлэх Намын Их Хуралд нийт 1309 төлөөлөгч сонгогдсон. УИХ-ын гишүүд, Засгийн газрын гишүүд, дэд сайд, төрийн бичгийн дарга, агентлагийн дарга нар, аймгийн намын хороодын дарга нар болон Удирдах Зөвлөлийн гишүүд квотоор мандат авсан байна. Мөн нийт гишүүдийн 25% нь буюу 300 нь эмэгтэй төлөөлөгчид сонгогдсон байна.
Өрсөлдөөнд Хүрэлсүх, Хаянхярваа хоёрын хэн нь ялах тодорхой болсон. Хүрэлсүх маш эртнээс бэлдсэн бол Хаянхярваа санамсаргүй, хажуунаас орж ирсэн. Хүрэлсүх үнэмшил итгэлээрээ дэвшсэн бол Хаянхярваа бусдын ятгалгаар дэвших жишээтэй зөрүү харагдаж байна. Тэгэхээр хэн ялах вэ ? Гэдгээс илүү -Хэдээр Хүрэлсүх ялах вэ? гэдэг асуудлыг л гишүүд, төлөөлөгчдийн хүрээнд хэлэлцэж байна.
Э.ЖАРГАЛСАЙХАН
