Ирэх хоёрдугаар сарын нэгний өдрөөс эхлэн тэтгэврийг 27 мянган төгрөгөөр нэмэгдүүлэн тооцож олгохоор боллоо. Ингэснээр 393 орчим мянган иргэний тэтгэвэр нэмэгдэх юм. Ингэхдээ бүрэн тэтгэврийн доод хэмжээг 280 мянган төгрөг, хувь тэнцүүлэн тогтоосон тэтгэврийн доод хэмжээг 243 мянган төгрөг байхаар шинэчлэн тогтоолоо. Тэтгэврийн нэмэгдэлд 100 гаруй тэрбум төгрөг зарцуулахаар төлөвлөжээ.
Мөн Нийгмийн халамжийн тэтгэмжийн хэмжээг ирэх сарын нэгний өдрөөс эхлэн 15 мянга, асаргааны тэтгэмж зургаан мянган төгрөгөөр нэмэх шийдвэрт хүржээ. Ингэснээр Нийгмийн халамжийн тэтгэмж 155 мянган төгрөг, асаргааны тэтгэмжийг сарын 72 мянган төгрөг болох юм.
Нийгмийн халамжийн тэтгэврийг тэтгэвэр авах эрх үүсээгүй ганц бие ахмад настан, хөгжлийн бэрхшээлтэй иргэд, тэжээгчээ алдсан хагас болон бүтэн өнчин хүүхэд зэрэг халамж шаардлагатай 61 мянга гаруй хүн авдаг байна.
Байнгын асаргаа шаардлагатай иргэнийг асарч байгаа болон хүнд нөхцөлд байгаа хүүхэд, ганц бие харж хандах хүнгүй ахмад настан, хөгжлийн бэрхшээлтэй иргэнийг гэр бүлдээ авч асрамжилж байгаа 59 мянга гаруй иргэн нийгмийн халамжийн асаргааны тэтгэмж авч байна.
Энэ оны Төсвийн тухай хуульд нийгмийн халамжийн тэтгэвэр, асаргааны тэтгэврийн хэмжээг нэмэхэд зориулж 17 тэрбум гаруй төгрөг баталсан юм.
