АТГ-ын мөрдөн шалгах хэлтэс өнгөрсөн сарын хугацаанд гэмт хэргийн шинжтэй 94 гомдол, мэдээлэл шалгасан байна. Эдгээрээс 32-т нь хэрэг бүртгэлтийн хэрэг нээжээ.
Харин албан тушаалтны авлига, ашиг сонирхлын зорчилтэй холбоотой 51 өргөдөл гомдлыг хянан шийдвэрлэжээ. Ингээд зөрчил гаргасан 6 албан тушаалтанд хариуцлага тооцуулжээ.
Сүхбаатар аймгийн Засаг дарга асан Ж Батсуурь, БОНХАЖ-ын сайдын зөвлөхөөр ажиллаж байсан А.Цолмон, Хот суурины ус хангамж ариутгах татуургын ашиглалт үйлчилгээг зохицуулах зөвлөлийн дарга Э.Пүрэвжав, БХЯ-ны ТНБД асан хурандаа Б.Батсайхан, БГД-ийн татварын байцаагч А.Энхтүвшин, ХУД-ийн татварын байцаагч Н Пүрэвдорж нарт холбогдох нийт 14 хэргийг тус тус шүүхэд шилжүүлэх саналтай харьяа прокурорын байгууллагад шилжүүлжээ.
Эдгээр хэргуүд нь "байгалийн ховор ургамал экслортлох зөвшөөрөл олгохын тулд бусдаас 65 сая төгрөгийн хээл хахууль авсан, хууль бус захирамжаар газар олгосны улмаас улсад 49 сая төгрөгийн хохирол учруулсан, төрсөн эгчийнхээ аж ахуйн нэгжтэй өндөр үнэтэй түрээсийн гэрээ байгуулж давуу байдал бий болгосон, эхнэрийнхээ эзэмшлийн амралтын газарт засвар хийлгэснээс улсад 109 сая төгрөгийн хохирол учруулсан, шалгалтаар очсон мэргэжлийн хяналтын байцаагчид хахууль өгсөн" зэрэг үйлдэлд холбогдолтой эрүүгийн хэргүүд байгаа юм.
С.ШҮРЭНЧИМЭГ