Хятад улс орчин үеийн, хөгжиж цэцэглэсэн, ард иргэд нь амгалан тайван нийгмийг бий болгох зорилтынхоо хүрээнд 2020 он гэхэд ядууралд цэг тавихаар эрчимтэй ажиллаж байгаа. Энэхүү ажлын хүрээнд Хятад улс сүүлийн таван жилийн хугацаанд 68.53 сая иргэнээ ядуурлаас гаргасан байна гэж тус улсын Ядуурлыг бууруулж, хөгжлийг дэмжих газар мэдэгдсэнийг “Синьхуа” агентлаг мэдээллээ. Энэ нь нэг жилийн хугацаанд 13 сая хүнийг ядуусын эгнээнээс гаргасан гэсэн үг юм. Хятад улсын ядуурлын түвшин 2012 онд 10.2 хувьтай байсан бол өнгөрсөн оны эцэс гэхэд энэ үзүүлэлт 3.1 хувь болж буурсан ажээ. Хятадын бодлого боловсруулагчдын хэлснээр 2018 онд 100 гаруй хошууны 10 сая гаруй иргэнээ ядуурлаас гаргах зорилт дэвшүүлсэн байна.
М.ЦАЦРАЛ