Өмнөд Африкийн “Стандарт” банкинд “Эрдэнэт” үйлдвэрийг барьцаалан зээл авснаас үүдсэн маргаан Арбитрын шүүх дээр хэлэлцэгдэн, манай улсын тал ялагдал хүлээсэн. Шүүхийн шийдвэрийн дагуу “Эрдэнэт" үйлдвэр зээлийн үлдэгдэл төлбөр болох 51 сая ам.доллараас гадна бусад төлбөрүүд багтаж, нийт 102 сая ам.долларыг төлөхөөр болоод байна. Уг төлбөрийн хүү өдөр бүр өсч байгаа бөгөөд нэг сард 700 мянга орчим ам.доллараар нэмэгдэх тооцоо гарчээ.
Уг нь Арбитрын шүүх дээр давж заалдах боломжтой ч манай улс давж заалдах эрх авч чадаагүй байна. Давж заалдах эрх авсан ч Арбитрын шийдвэр нэгэнт гарсан бол ялах магадлал тун ховор байдаг талаар зарим мэргэжлийнхэн онцолж байна. Арбитрын шүүхийн шийдвэр гарсан учраас манай улс уг өрийг төлөх нь тодорхой болж байна. Харин тухайн төлбөрөө яаж төлөх вэ гэдгээ хурдан шийдвэрлэх хэрэгтэй болж байгаа бололтой. Төлбөрийн хугацааг хойшлуулах, хүү, торгуулийг зогсоох зэрэг аргуудаас аль нэгийг нь сонгож тодорхой хэлэлцээ хийснээр хүү нэмэгдэхгүй байх боломжтой юм байна.
Ийнхүү хэдхэн эрх мэдэлтнүүдийн зоргоороо авираас болж Монгол улс 102 сая доллар буюу 250 орчим тэрбум төгрөгийн өрөнд ороод байна.
С.ШҮРЭНЧИМЭГ