Өнөөдөр Захиргааны Хэргийн Анхан Шатны Шүүхэд Төв аймгийн Заамар суманд олгосон 21 мянган га газрын маргаантай холбоотой шүүхийн урьдчилсан хэлэлцүүлэг боллоо. Уг маргаанд Заамар сумын гурван иргэн нэхэмжлэгчээр, Ашигт Малтмал Газрын Тосны Газар хариуцагчаар, лиценз эзэмших эрх бүхий "Эрдэнэсийн эрэг" ХХК гуравдагч талаар оролцож байгаа юм.
Маргааныг эргэн сануулахад:
2017 онд Засгийн Газар тогтоол гаргаж Алт-2 хөтөлбөрийн хүрээнд Төв аймгийн Заамар сум Өвөрнаймган гэх газарт 21 мянган га газарт ашигт малтмал олборлох зөвшөөрөл олгоод байсан юм. Гэвч энэхүү 21 мянган га нь орон нутгийн тусгай хэрэгцээнд авсан газар бөгөөд энд лиценз олгосон асуудал нь хууль бус үйлдэл болсон гэж нутгийн иргэд үзэн тэмцэж эхэлсэн байдаг.
Жил дамнан үргэлжилж байгаа тэмцлийн үр дүнд 21 мянган га газрыг АМГТГ-аас 15 мянга га болгож бууруулсан байдаг. Харин энэхүү 15 мянган га газрыг орон нутгийн өмчтэй гэгдэх "Эрдэнэсийн эрэг" ХХК-д өгсөн байдаг юм.
Гэсэнч нутгийн иргэд газраа авч үлдэхийн төлөө үргэлжлүүлэн тэмцсээр өнөөдөртэй золгосон юм.
Харин өнөөдөр шүүх хурал хойшилсон шалтгааныг тодруулбал, АМГТГ Заамарт олгосон 15000 га тусгай зөвшөөрлийн талбайг багасгаж 3900 болгосон шийдвэрийг 3 сарын 5 буюу хоёр өдрийн өмнө гаргажээ. Энэ асуудалд дээр нь дөрөөлж гуравдагч буюу лиценз эзэмших эрхтэй "Эрдэнэсийн эрэг" ХХК хэлэлцүүлгийг хойшлуулах хүсэлт гаргаснаар шүүх хурлыг 10 хоногоор хойшлуулсан юм. Гэвч нутгийн иргэд шүүх нийт иргэдийн талд бус нэгхэн компанийн талд шүүх үйлчилж байна гэж үзэж байна.
Энд бас нэгэн зүйл сануулахад, УУХҮ-ийн сайд Д.Сумъяабазар тушаал гарган өмнөх сайдын гаргасан А-129-р журмыг хүчингүй болгох шийдвэрийг өнгөрсөн 2-р сард гаргасан юм.
Өөрөөр хэлбэл, орон нутгийн тусгай хэрэгцээнд авсан газар дээр лиценз олгох боломж бүрдүүлсэн А-129 гэх тушаалыг хүчингүй болгосноор энэ тушаалаар Заамарт олгогдсон лиценз ч хүчингүй болох боломж бүрдэж байгаа хэрэг. Харин 10 хоногийн дараа болох шүүх хурал энэ асуудлыг хэрхэн шийдэх вэ гэдгийг харах л үлдэж байна.
С.ШҮРЭНЧИМЭГ