Сангийн сайд асан С.Баярцогтыг авлига, хээл хахууль авсан, олон улсын төвшинд мөнгө угаасан гэх хэргээр Швейцарь улсын прокуророос шалгаж байгаагаа мэдэгдсэн юм. Улмаар түүний Швейцарийн хэд хэдэн банкинд байрлаж байгаа 1.85 сая ам.долларын хадгаламж бүхий данснуудыг нь царцааснаа ч мэдэгдсэн юм.
Харин царцаасан дансны мэдээлэл дунд 2008 онд С.Баярцогтод 10 сая ам.доллар шилжиж орж ирсэн баримт бий.
Энэ мэдээлэл өчигдөр олон нийтийн дунд шуугиан тарьж АН С.Баярцогтыг намаасаа хөөх шийдвэр хүтэл гаргасан юм.
Энэ бүхний хариуд өнөөдөр Сангийн сайд асан С.Баярцогт мэдээлэл хийж, өөрийгөө “энхийн цагаан тагтаа” болгож цайрууллаа.
Учир нь тэрээр өмнө нь оффшорийн хэрэгт орооцолдохдоо хэвлэл мэдээллийнхэнд тайлбарлаж байсантайгаа утга ижил тайлбар хийсэн юм.
Ингэхдээ:
“2006 Олон улсын хөрөнгийн зах зээл дээр хувьцааны бизнес хийх гэж Швецайрьт данс нээсэн. Монголын нэг бизнесмэнээс 8,2 сая еврогийн зээл авч Швейцарь дахь дансандаа хийсэн. 2013 онд эргүүлэн татсан. Харин саяын царцаасан данс бол надад мөнгө шилжүүлж байсан нэртэй бизнемэний данс”. гэсэн тайлбар хийж “надтай холбоотой гэж үзээд байгаа тэр 10 сая доллар чинь монголын нэг нэртэй бизнесмэнийх” хэмээн сэтгүүлчдийн амыг тагласаар гарч одсон юм.
Ингэснээр тэрхүү нэртэй бизнесмэнийг нь олж асуултаар булах нь хэвлэлийнхэнд үлдэв бололтой.
Ямартай ч монголын бүх хэвлэл мэдээллүүд цугласан энэ хурлаас С.Баярцогт “энхийн цагаан тагтаа” болоод гарав.
С.ШҮРЭНЧИМЭГ
