Нас бол бүртгэл, ердөө л тоо юм. Д.Гантулга 28 насандаа УИХ-ын гишүүнээр сонгогдсон. Хамгийн залуу гишүүн. "Улаан махны" асуудалд орооцолдсон. "Шулмын урхи" байсан эсэхийг таахад эртдэнэ. Төрийн түшээгээр Хэнтий аймгаас нэгэнт сонгогдсон учир түүний нас залуу нь уучлалд үл хамаарагдана. Төрт ёс, төрийн хар хүний ноён нуруу, өөрөөр хэлбэл төрийн түшээ гэдэг утгаар нь нийгэм харж, дүгнэж байна.Тэр өнөөдөр 30 нас шүргэж байна. Гэхдээ л төлөвшөөгүй, боловсроогүй, хөгжөөгүй, хий нь арилаагүй, хор нь дарагдаагүй гэдэг нь л өнгөрсөн хугацаанд харагдав.
Тэгвэл Чингис хаан түүний 28 насан дээр Монголын хаанд өргөмжлөгдсөнийг санах нь зөв. -Чингис хаан 18 насандаа удирдагчийн бүх шинжийг өвлөсөн. Удирдагч болох сэтгэл зүйн бэлтгэл суусан. Хүн зоны амар амгалан зайлшгүй гэдгийг амьдралаараа туулж мэдэрсэн. Орчин нөхцөлөө бодитой мэдрэх чадвар эзэмшсэн. Зорилгодоо хүрэхийн тулд өшөө хорслоо даран байж, дайсантайгаа нөхөр мэт хамтран ажиллах арга ухаан суусан. Хүний сэтгэлийг эзэмдэх уран яруу аргыг сайтар эзэмшиж чадсан. Бусдын алдаан дээр суралцах чадвар сууж, дайсныхаа үгийг ч анхааралтай сонсож, оюун ухаандаа дүгнэлт хийдэг болсон. Туулж өнгөрүүлсэн амьдрал, түүнээс олсон ухаарал, сургамж нь Чингис хааны удирдахуйн шинжлэх ухааны нөхцөл суурь болсон. Түүнд хаан, удирдагч хүнд байвал зохих олон шинж чанар, чадвар, ухаан билэг цогцолсон хүн байсан тул Хамаг Монголын хаанаар 28 насанд аь өргөмжилсөн гэж эрдэмтэн, судлаач Т.Дорж өгүүлсэн байдаг.
Гантулгын насан дээр Чингис хаан хамаг Монголын хаанаар өргөмжлөгдөж байжээ. Гэтэл өнөөгийн төрийн түшээ 28 насандаа дэндүү нялхдаж, балчирдаж байна. Тиймээс сонгуулийн хуулийн нэр дэвшигчийн заалтанд ч насыг нь ахиулах санал хэлэлцэгдэж, боловсруулах шатандаа оров. Ингэснээрээ 28 настай монгол залуучуудын төрийн жолоог атгалцах эрхийг хаахад хүргэв. Тэр өөрийн залуу үеийнхнээ хөлдөө чирлээ.
Ц.ХИШГЭЭ