Монгол Улсын ерөнхий сайд асан Ч.Сайханбилэг уржчигдар буюу 4-р сарын 9-нд үдээс хойш эх орондоо ирсэн. Түүнийг АНУ-ын Денверт амьдарч байхад нь прокурорын газраас дуудах хуудас илгээсэн юм. Харин эх орондоо ирсэн тэрээр өчигдөр АТГ-т байцаалт өгөхөөр очсон бөгөөд улмаар түүнийг үдээс хойш 21:00 цагийн үед саатуулсан байна. Ч.Сайханбилэгийг Дубайн гэрээтэй холбогдуулан саатуулжээ.
Мөн өчигдөр ерөнхий сайд асан, АНУ-д суугаа элчин сайд С.Баярыг ч АТГ-аас саатуулсан тухай мэдээлэл гарч эхэллээ. Түүнийг Оюутолгойн гэрээ, оффшор данстай холбогдуулан шалгаж байгаа юм. Өнгөрсөн сарын 12-нд АТГ-аас Ерөнхий сайд асан С.Баярыг “Жаст” групп болон Оюутолгойн гэрээ, оффшор данстай холбоотойгоор 10 гаруй цаг байцаагаад зүгээр явуулсан байдаг ч энэ удаад ийнхүү саатуулжээ.
Хэдийгээр Ч.Сайханбилэг төрийн хамгаалалтанд байгаа, С.Баяр Онцгой эрхт элчин сайдын алба хашиж байгаа нь саатуулах үндэслэл болохгүй ч тэднийг саатуулсан нь баттай хэмээн зарим мэдээллүүд онцолж байгаа юм.
Монгол Улсын Засгийн газрын 2009 онд Оюутолгой компанитай байгуулсан хөрөнгө оруулалтын гэрээний зарим үүрэг биелэгдээгүй гэх асуудлаар АТГ-ын Мөрдөн шалгах хэлтэс эрүүгийн хэрэг үүсгэн шалгаж эхэлсэн юм.
С.ШҮРЭНЧИМЭГ