БАО-гийн уулзалтыг нээж хэлсэн үгэндээ Хятад улсын хөгжлийн түлхүүр болох дөрвөн үзэл баримтлалыг Си Жин Пин танилцуулав.
-Залгамжилсан эдийн засгийн шинэчлэлийг үргэлжлүүлэх
-Хөгжлийн хурдыг нэмсэн идэвхтэй үйл ажиллагааг эрчимжүүлэх
-Ил тод, нээлттэй байдлаа улам нэмэгдүүлэх
-Дэлхий ертөнцөд дэмжлэг тусламж үзүүлэх
Энэ бол Хятад улсын хөгжлийн түлхүүр болох гол зарчим. Энэ үзэл баримтлалд тулгуурлан Хятад улсыг нээлттэй, инновацтай хөгжүүлнэ гэдгээ ч СиЖин Пин дарга илтгэлдээ дурдав. Гадагшаа харсан эдийн засгийн бодлого нь хамтрах, хамтдаа бүтээх, хөгжих санааг агуулахаас бусдын эрх ашигт, тусгаар тогтнолд нь аюул заналхийлж болохгүй гэдэг үгийг тэрбээр онцоллоо. Хамтын ажиллагаа, хөрөнгө оруулалт нь тухайн хамтарч буй улс орны тогтвортой хөгжлийг хангахад чиглэнэ, харилцан үр ашигтай байх алтан зарчим дээр тулгуурлана гэж нэмж хэллээ.
Хятадын өмнөд хэсэгт орших Хайнань аралд 2001 оноос зохиож буй БАО-гийн эдийн засгийн форумыг Давосын Азийн эдийн засгийн форум ч гэж нэрлэхэд хүрснийг эдийн засагчид цохон тэмдэглэж байв. Энэ удаагийн форумд Филиппиний ерөнхийлөгч, Австрийн холбооны улсын ерөнхийлөгч, Сингапур, Пакистан, Шинэ Зеландийн ерөнхий сайд нарын хамт Монгол улсын ерөнхий сайд У.Хүрэлсүх оролцож, Ази тивийн худалдаа-эдийн засаг, улс төрийн сэдвээр санал солилцлоо гэж Синьхуа агентлаг мэдээллээ.
Ц.ХИШГЭЭ
