Таван толгойнхон хоногтоо 1735 машин нүүрс хилээр тээвэрлэж байсан оргил үе бий. Өнгөрсөн зунаас энэ тоо 3 дахин буусан нь Хятад улсын Гаалийн байгууллагаас гаргасан шийдвэрийн шууд үр дагавар. Өнөөдөр 700 машин хоногтоо хил гарч байснаас ерөнхий сайдын айлчлалын үеэр үл ялиг дээшилж 770 хүрсэн мэдээллийг гаалийн байцаагчид мэдээлсэн. Нүүрс ачсан том оврын машины цуваа 140 км урт бөглөрлийг хилийн наана үүсгэсэн түүх, түүний зовлонг жолооч нар амссан. Жолооч нар өмнө нь сардаа 4-5 рэйс хийж амждаг байсан бол сүүлийн хагас жил нэг, хоёроос хэтрэхээ больж, тэдий хэмжээгээр олдог орлого нь буурсан. Тиймээс хил давангуутаа Хүрэлсүх ерөнхий сайдын хамгийн түрүүнд зорьж уулзсан хүмүүс бол тэдгээр зовж буй тээврийн жолооч нар байлаа. 14-16 хоног зам дээр урт цуваанд зогсож, кабинаараа гэр хийж, унтах ая тухтай байр, хооллож ундалчих тогтсон газаргүй, сар өдрөөр усанд орчих боломжгүй нүүрс тээвэрлэж байгаагаа ерөнхий сайд У.Хүрэлсүхийг Гашуун сухайтаар эх орондоо буцан ирэхэд нь уулзаж, зовлон жаргалаа тоочсон. Дээд хэмжээний айлчлалаас дөнгөж хил давангуут нөгөөх л зовлон, бэрхшээл ерөнхий сайдыг ийнхүү угтсан.
Урд хөршид хийсэн дээд хэмжээний айлчлалын төгсгөлийг Өмнөговь аймагтай хил залгаа Хятад улсын Өвөрмонголын автономит улсын Баян сумаар өндөрлөсөн нь зорилго чиглэлтэй байлаа. Хилийн цаана өндөр хөгжил, дэд бүтэц, хурдны зам, цэцэглэж буй ой мод. Хилийн наана байгаль орчин сүйдсэн, тоос шороо л босох. Харьцуулах зүйл их. Хилийн наана, цаана байгаа хэрнээ хөгжлөөрөө өдөр, шөнө шиг ялгаатай. Ийм л арчаагүй дүр зураг харагдаж буйг ерөнхий сайд харьцуулан хэлж амжив. Гэрэл гэгээ, дэд бүтэц, толь шил болсон засмал зам бүхий Баяннуур сумаас тоос боссон, дэд бүтэц хөгжөөгүй Өмнөговийн Гашуун сухайтад хөл тавьцгаасан гэж сэтгүүлчид л түүний үгийг дэмжсэн. Ерөнхий сайдыг түүний кабинетийн 7 сайд дагалдсан.
Шөнө дөлөөр "Эрдэнэс Таван Толгой ХК-г зорьж ирэн, тэдний кэмпэд уурхайчидтай хоноглож, маргааш нь Өмнөговь аймаг, Цогцэций сумын удирдлага, Орон нутгийн Бага Таван толгой ХК, Энержи Ресурс ХХК, төрийн өмчит Эрдэнэс Таван Толгой ХК-ийн удирдлагатай шуурхай зөвлөгөөн хийж, үйл ажиллагаатай нь танилцахад тэд оролцсон. Шуурхай зөвлөлгөөний гол чиглэл бол хамтран ажиллах. Ийм үүрэг даалгаврыг гурван өөр өмчит компаниудад ерөнхий сайд үүрэг болгосон. Төрийн өмчит Эрдэнэс Таван Толгой ХК-ийн хөгжлийн шинэ төслийг боловсруулах, цахилгаан станц, баяжуулах үйлдвэр, параллель замын төслөө Засгийн газарт танилцуулах, иргэдэд хувь оногдуулах хугацааг наашлуулах, IPO хийх зэрэг үүрэг даалгаврыг гүйцэтгэх захирал Б.Ганхуягт өгсөн.
Мөн зам дагуу нүүрс тээвэрлэн "зовж" буй жолооч нараа хайрлахыг, тэднийг хооллож ундалчих, усанд орчих нөхцөлөөр нэн даруй хангахыг Энержи ресурс, Бага таван толгой ХК, Эрдэнэс Таван Толгой ХК-ийн дарга нарт үүрэг болгов. -Хүнээ л хайрла. Жолооч нар бол уурхайн нэг бүрэлдэхүүн хэсэг. Тэд нар чинь зовж зүдэрч байна. Тэдхийгээ хайрлая. Та нар орлогоо нэмэгдүүлж, үр ашигтай ажиллаж байгааг сонсох таатай байна. Гэхдээ л хүнээ хайрла. Олсон орлого, үр ашгаасаа багаахан хэсгийг ч бусдын сайн сайхны төлөө зарцуул. Дарга хүн бол сэтгэлтэй байх ёстой гэдгийг шуурхай зөвлөлгөөний төгсгөлд онцгойлон анхааруулав.
Ц.ХИШГЭЭ