Зам тээврийн ослын ихэнх хувийг орон нутгийн зам дахь осол эзэлдгийг албаныхан хэлдэг. Ингэхдээ жолооч болон зорчигчид суудлын бүс хэрэглэхгүй байх нь элбэг байдаг байна. Тухайлбал өнгөрсөн оны байдлаар улсын хэмжээнд зам тээврийн осолд өртөж амь насаа алдсан хүмүүсийн 14 орчим хувь нь хамгаалах бүс хэрэглээгүй, 27 хувь нь хэрэглэсэн эсэх нь тодорхойгүй гэсэн тоо гарчээ. Харин нийслэл хот дотор хамгаалалтын бүс зүүх нь 18 орчим хувиар нэмэгдсэн гэсэн үзүүлэлт гарсан байна. Үүнээс үзвэл жолооч нар суудлын бүс зүүх нь торгуулахгүй өнгөрөх боломж гэж ойлгодог нь харагдаж байгаа юм.
Өөрөөр хэлбэл цагдаа байгаа газарт хамгаалалтын бүс зүүж, хараа хяналт султай газар буюу орон нутгийн замд бүс зүүлгүйгээр амь насаа эрсдэлд оруулдаг байна. Үүнийг замын цагдаагийн албаны мэргэжилтнүүд ч баталдаг. Цагдаа нарт зориулж хамгаалалтын бүс хэрэглэдэг зарим жолооч нарын хэнэггүй байдал нь зам тээврийн ослоор амь насаа алдаж буй хүмүүсийн тоо нэмэгдэх шалтгаан болж байгаа юм. Иймээс жолооч нар хамгааалалтын бүсээ хэрэглэж хэвших, зорчигчид шаардлага тавьж учирч болох эрсдлээс амь насыг нь хамгаалах үүрэг хүлээж байгаагаа ухамсарлах хэрэгтэйг ЗЦА-аас анхааруулсаар байгаа билээ.
О.НАНСАЛМАА