Өнөөдөр Монголын шатахуун хэрэглэгчдийн холбооныхон монголд хуурамч шатахуун зарагддаг талаар мэдээлэл хийлээ. 2015 оноос эхлэн иргэд чанаргүй шатахууны талаар гомдол гаргаж байгаа ч холбогдох байгууллагууд дорвитой хөдлөхгүй байсаар өнөөдөртөө золгосныг Монголын шатахуун хэрэглэгчдийн холбооны тэргүүн О.Бямбадэлгэр хэлж байна. Тиймээс тус төрийн бус байгууллагынхан шатахуун импортлогч 17 компанийн шатахууны дээжид лабораторын шинжилгээ хийлгэжээ. Шалгалтаар бүх дээж стадартын шаардлага хангаагүй гэсэн хариу гарсан байна. Цэвэр шатахуун нь, тунгалаг өнгөтэй байдаг. Тэгвэл зураг дээрх бор хүрэн өнгөтэй, тунадас үүссэн шатахууныг хуурамч шатахуун болохыг нотолж байгаа юм.
Уг асуудалд төрийн зүгээс 2017 онд Уул уурхай, хүнд үйлдвэрийн яам, Ашигт малтмалын газрын тосны газар, МХЕГ-ын хамтарсан ажлын хэсэг гарч хуурамч шатахууны мөрөөр томоохон шалгалт хийсэн байдаг. Ажлын хэсгийн дүгнэлтээр МХЕГ-аас "Трафигару", "Транс Гайд", "Хар мөрөн импекс", "Ай си Ай Си", "Петролиум продакшн", зэрэг компаниудын тусгай зөвшөөрлийг цуцлах, үйл ажиллагааг хаах санал оруулсан байгаа юм. Гэвч шалгалтын албан ёсны дүн одоо хүртэл гараагүй, Засгийн газарт танилцуулаагүй байгаа аж. Ийнхүү өмнөх ажлын хэсгийн дүгнэлтийг олон нийтэд танилцуулаагүй атлаа дахин хамтарсан ажлын хэсэг гарч байгаа нь хэргэлэгчдийн эргэлзээг төрүүлж байна гэж тэд үзэж байгаа юм.
Хуурамч шатахууны талаарх ажлын хэсгийн дүгнэлт гараагүй байгаа нь хэрэглэгчдийн эргэлзээг төрүүлж байна
Дээрх шинжилгээг Иргэний нисэхийн ерөнхий газар болон Монголын итгэмжлэгдсэн лабораторид өгч шинжлүүлэхэд хариу нь ижил гарсан тухай МШХХ-ны дэд тэргүүн Б.Сайнбаяр хэллээ. Тиймээс уг шинжилгээг үндэслэн МУ-ын Ерөнхий сайд У.Хүрэлсүх, Сангийн сайд Ч.Хүрэлбаатар нарт шаардлага хүргүүлж байгаа юм байна.
О.НАНСАЛМАА
