Эрүүл мэндийн салбарын 50 мянган ажилтныг төлөөлж, эмч, сувилагч нар 9 дэх өдрөө суулт хийж, эсэргүүцлээ илэрхийлж байна. 10 мянган эмч, 19 мянган сувилагч боолын цалингаар ажиллаж, амьдралаа залгуулах гэж зүдэрч явааг тэмцэлд нэгдсэн эмнэлгийн ажилтнууд хэлж байна. Хөгжилтэй орны сувилагч өдөртөө 100$ цалин хөлс авдаг бол, Монголын сувилагч 30 хоног ажиллаж байж 150 ам доллартай тэнцэх цалин хөлс авдаг байна. Бүгд өрөнд баригдаж, зээлэнд " ороогдон хүлэгджээ". - Засгийн газарт шаардлагаа хүргүүлж, цалингаа 50 хувь нэмүүлэх л шаардлага тавьсан. Хариугаа энэ сарын 28- нд авна. Бид сая саяар нэмж өг гэж шаардаагүй. Үе шатлалтайгаар нэмэх, эхний ээлжинд 50 хувь буюу 200 мянган төгрөг нэмэх санал хүргүүлсэн гэж сувилагч, эмч нар хэлж байна.
Ц.ХИШГЭЭ