Өчигдөр “Сентрал тауэр” оффист Хуульчдын холбооны “Хууль зүйн шинжлэх ухаан, боловсролын дэмжих хороо”-оос “Үндсэн хуулийн цэцийн гишүүнд тавигдах шаардлага, түүний томилгоо” сэдэвт хэлэлцүүлэг зохион байгууллаа. Уг хэлэлцүүлэгт МУИС-ийн Хууль зүйн сургуулийн багш, доктор, дэд профессор О.Мөнхсайхан, тус сургуулийн дэд захирал доктор, А.Бямбажаргал нар илтгэл тавьж, хуульчдаар хэлэлцүүллээ.
Цэцийн гишүүн хууль зүйн мэргэшилтэй, онолын мэдлэгтэй байх ёстой. Гэвч Ерөнхийлөгчийн дэвшүүлсэн гурван хүн нь эрх зүйч мэргэжилтэй ч мэргэжлээрээ ажиллаж байгаагүй, Үндсэн хуулийн маргаан шийдвэрлэх түвшний мэргэшсэн хүмүүс биш. Хуульчдын зүгээс Үндсэн хуулийн цэцэд хандах хууль эрх зүйн гаргалгааг эрэлхийлж байна. Үндсэн хуулийн цэцийн гишүүнээр томилогдох шаардлага хангаагүй хүмүүс томилсон, томилгоо хийх процесс нь буруу хийгдсэн гэж доктор, дэд профессор О.Мөнхсайхан хэллээ.
Өнгөрсөн хугацаанд Цэцийн гишүүнийг томилохдоо маш сайн шаардлага тавьдаг байсан. Сая бол зүгээр л нэг хүний хамт ажилладаг хүмүүсийн таашаалд нийцсэн хүмүүсийг томилсон. Шинээр томилогдсон хүмүүсийг хуулийн чиглэлээр ажиллаж байсан нь ч эргэлзээтэй, мэдэгдэхгүй байгаад харамсаж байгаагаа хуульч Б.Баяр илэрхийллээ.
Үндсэн хуулийн 65 дугаар зүйлийн 2 дахь хэсэгт ”Үндсэн хуулийн цэцийн гишүүнээр хууль зүй, улс төрийн өндөр мэргэшилтэй, Монгол Улсын дөчин нас хүрсэн иргэнийг томилно” гэж заажээ. Гэтэл Ерөнхийлөгчөөс санал болгосон гурван нэр дэвшигч нар энэ шаардлагыг хангаж байгаад хуульчид эргэлзэж байгаа юм байна.