Наадам дөхсөн энэ үед цаг агаарын байдал ямар байхыг Ус, цаг уур, орчны шинжилгээний газраас тодрууллаа.
Цаг агаарын урьдчилсан мэдээгээр энэ долдугаар сард олон жилийн дунджаас 1-2,5 градусаар дулаан байх юм байна. Өөрөөр хэлбэл, энэ сард нэлээд халах төлөвтэй байгаа аж. Урьдчилсан мэдээнээс харвал 33-38 градус хүрч хална.
Хэдий халах төлөвтэй ч хур тунадас олон жилийн дунджаар орох юм байна. Тухайлбал, энэ сарын 6-нд төв болон говийн бүсэд, 7-нд зүүн аймгуудын нутгаар бороотой байна. Харин сарын дунд үед нутгийн ихэнх хэсгээр түр зуурын дуу цахилгаантай бороо орж, сэрүүснэ. Уулархаг газраар шөнөдөө 4-9 градус, өдөртөө 15-20 градус дулаан. Их нууруудын хотгор, Алтайн өвөр говиор шөнөдөө 15-20 градус, өдөртөө 25-30 градус дулаан. Бусад нутгаар шөнөдөө 9-14 градус, өдөртөө 20-25 градус дулаан байна. Тэгвэл сарын сүүлээр Их нууруудын хотгор, Олон нууруудын хөндий, Алтайн өвөр говиор өдөртөө 33-38 градус, бусад нутгаар 27-32 градус хүрч халах нь ээ.
Наадмаар эхний өдөр нь халуун нартай байх ч баярын сүүлийн өдрүүдэд бороо орно. Мөн уулархаг нутгаар хур тунадас ширүүсч, усархаг бороо орж болзошгүй тул иргэдийг үер усны аюулаас сэрэмжтэй байхыг анхааруулав.
Т.САРУУЛТУЯА
