Бүх цэргийн ерөнхий газрын гэгээнтэн Их наран хутагт гэх нэг нөхөр орон нутгийн цэргийн ангиудаар явж, сан тавин, сум харваж, нийгмийн сүлжээг шуугиулаад авсан. “Их Наран хутагт маань агаарын довтолгооноос хамгаалж сум тавилаа”, “Баянхонгор, Говь-Алтай, Ховд, Завхан, Архангай аймгуудаар явж цэргийн ангиудад тахилга хийн, соён гэгээрүүлэх тусгай лекц номлол айлдлаа” гэхчлэнгээр шүүмж, элэглэлийг хослуулан хэд хоног цахим хуудсаар бичив.
Тэгвэл Батлан хамгаалахын сайд Нямаагийн Энхболд энэ талаар тайлбар хийж, “Юун яасан цэргийн гэгээнтэн” гэсэн байх юм. Н.Энхболдын хувьд У.Хүрэлсүхийн Засгийн газрын танхимд багтаж ороод даруй жилийн хугацаа өнгөрч байхад ганц удаа дааж авсан салбарынхаа тухай ам нээж байсангүй. Харин энэ удаад цэргийн гэгээнтэн бээр сайдыг хэвлэлд ярилцлага өгөх хэмжээнд хөдөлгөсөн бололтой. Батлан хамгаалах салбар гэгээнтэн, ламгүй гэх тайлбарыг хийхийнхээ далимд салбарын тулгамдаж байгаа асуудлуудаа ч яриад амжжээ.
Б.Жаргал