Энэ намрын улс төрийн нэг том “тулаан” Хэнтийн нөхөн сонгууль. Намууд хэнийгээ сойх вэ гэдгээ дотроо шийдэхээр яриа хөөрөөгөө эхлүүлээд буй. Өнөөдөр МАХН-аас Бага чуулганаа хийхээр болсноо мэдээллээ. Бага чуулганаар хэн нь Хэнтийд нэр дэвшихийг шийдэх юм байна. Тус намын дарга Н.Энхбаярын хувьд “Манай нам онцгой анхаарч, энэ нөхөн сонгуульд орно” гэж хэлснийг бодоход тэрбээр өөрөө дэвших нь бараг тодорхой болов уу.
Ер нь сүүлийн үед бусад нам наадам, зуны амралт гээд тал бүр тийшээ тарчихаад байхад МАХН-ын улс төрийн ажлууд идэвхжээд байгаа юм. Өнгөрсөн Ерөнхийлөгчийн сонгуульд нэр дэвших гэтэл Эрүүгийн хуулиар “хориг тавиулсан” Н.Энхбаяр одоо боломж гарсан дээр УИХ-д суухын төлөө тун чиг “улайрч” яваа биз ээ.
Дашрамд дурдахад, Ерөнхий сайд У.Хүрэлсүх энэ нөхөн сонгуульд нэр дэвшихгүй гэдгээ мэдэгдсэн. Түүнийг Н.Энхбаяртай тулахаас хулчийлаа гэж улс төр сонирхогчид дүгнээд байгаа билээ.
Ц.ЖАРГАЛ