Наадмын амралттай зэрэгцэн орон нутгийн замд зорчигчдын тоо эрс ихэсч, хөдөө зам дахь осол хэрэг, түүнээс үүдэлтэй нас баралт, гэмтэл ч ихэсч байна. Энэ сарын 10-15ны өдрүүдэд улсын хэмжээнд нийт 427 зам тээврийн осол бүртгэгдсэн бөгөөд ослын улмаас нийт 16 хүний амь нас хохирсон харамсалтай мэдээ байна.
Нийт бүртгэгдсэн ослын 91 нь, амь нас нь хохирсон хүний 13 нь зөвхөн орон нутагт бүртгэгджээ. Үүнээс зам тээврийн осолд өртөж, хохирсон хүний 14 нь бага насны хүүхэд байсан ба үүнээс 3 хүүхдийн амь нас харамсалтай байдлаар хохирч, 11 хүүхэд хөнгөн, хүндэвтэр байдлаар гэмтэж бэртжээ. Ихэнх жолооч орон нутгийн замд зорчихдоо суудлын бүсээ бүсэлдэггүй, хурд хэтрүүлдэг, анхаарал болгоомж муутай явдгаас болж гэр бүлээрээ амиа алдах эрсрдэл маш өндөр байдгийг цагдаагийн албан хаагчид хэлдэг. Наадмын үеэр амиа алдсан 3 хүүхэд эцэг, эх, асран хамгаалагчийн хамт тээврийн хэрэгсэлээр зорчиж байх үедээ, буруу тээвэрлэлтээс шалтгаалж амь насаа алдсан байна.
НААДМААР АМИА АЛДСАН ХҮНИЙ ТОО 60 ХУВИАР ӨСЧЭЭ
Дээрх статистик үзүүлэлтийг өнгөрсөн жилийн мөн үетэй харьцуулахад зам тээврийн осол 12 хувиар, амь нас нь хохирсон хүн 60 орчим хувиар өссөн үзүүлэлт гарчээ. Тухайлбал Төв аймгийн Борнуур сумын нутаг асфальтан замд T.Estima маркийн автомашин онхолдож, зорчигч 2 настай, эмэгтэй А-н амь нас хохирсон байна. Мөн Хөвсгөл аймгийн Цагаан-Үүр сумын нутагт T.Landcruiser маркийн автомашин онхолдож зорчигч 2 настай Б-н амь нас хохирсон ноцтой хэргүүд бүртгэгдсэнийг аймгийн Цагдаагийн газрууд шалгаж байгаа юм байна.
Орон нутгийн замд бүртгэгдсэн хүний амь нас хохирсон зам тээврийн ослын дийлэнх хувь нь буюу 10 осол нь онхолдох хэлбэрээр гарчээ. Энэ нь 100 хувь жолоочийн хариуцлагагүй байдлаас үүдэлтэй гэдгийг цагдагийн байгууллагынхан хэлж байгаа юм.
Б.ХУЛАН