АНУ-ын Ерөнхийлөгч Д.Трамп, ОХУ-ын Ерөнхийлөгч В.Путин нар өчигдөр Финляндын нийслэл Хельсинк хотноо анхны дээд хэмжээний уулзалтаа хийлээ. Тэд өмнө нь олон улсын том арга хэмжээ, уулзалтад таарч байсан ч ийн анх удаа хаалттай хаалганы цаана зөвхөн орчуулагчдын хамт уулзав.
Хоёр цаг гаруй үргэлжилсэн уулзалтынхаа дараа тэд хамтарсан мэдэгдэл хийсэн юм. Дональд Трамп энэ уулзалтыг дүгнэж хэлэхдээ урьд өмнө нь таарамжгүй харилцаатай байсан ч хэдхэн цагийн өмнөөс энэ харилцаа өөрчлөгдлөө гэсэн байна. Тэд Сирийн дайныг хэрхэн төгсгөл болгох, “Хойд Урсгал-2” төслийн талаар ярилцаж, санал солилцжээ.
Мөн 2016 онд АНУ-ын Ерөнхийлөгчийн сонгуульд Оросын талаас нөлөөлсөн гэх асуудалд В.Путин няцаалт хийж, ОХУ ямар нэгэн нөлөөлөл үзүүлээгүй гэдгийг хэлжээ. Уулзалтын дараа Дэлхийн хөлбөмбөгийн аваргын тэмцээнийг амжилттай зохион байгуулсанд нь В.Путинд баяр хүргэсэн байна. Хариуд нь хөлбөмбөгийн тэмцээний албан ёсны бөмбөгийн Д.Трампад бэлэглэжээ.
Хоёр Ерөнхийлөгчийн уулзалтаас гадна ОХУ-ын Гадаад хэргийн сайд С.Лавров, АНУ-ын Төрийн департаментийн дарга Майк Помпео нарын уулзалт ч мөн болсон юм.
Ц.ЖАРГАЛ
