АТГ-ын даргын өрөөнд Ерөнхий сайд асан С.Баярыг дайлсан тухай бичлэг сошиал сүлжээнд тараад байгаа. Харин АТГ-ийн зүгээс дараах хариуг бидэнд өглөө.
Тэдний хэлж буйгаар АТГ-ын хяналтын камерын бичлэг алдагдсан байж болзошгүй гэнэ. Байгууллагын дотоод албаны шалгалтыг 2018 оны 6 дугаар сард явуулсан бөгөөд улмаар АТГ-ын Аюулгүй байдал, хяналт шалгалт, нууцын албаны албан хаагчийн хувийн сонирхол бүхий хууль бус үйлдлийн улмаас бичлэг гадагш алдагдсан нөхцөл байдал тогтоогдсон байна. Иймээс тус албан хаагчийг ажлаас нь халжээ.
С.Баярын уулзалт нь 2018 оны 5 дугаар сарын 3-ны өдөр болсон бөгөөд прокурорын зөвшөөрлийн дагуу хийгдсэн ажиллагаа гэдгийг АТГ-ын олон нийттэй харилцах ажилтан, комиссар Т.Мөнхтунгалаг хэллээ.
Уулзалтын дараа С.Баярын байцаалт залган үргэлжилсэн байна. С.Баяр нь АТГ дээр 7 цаг босон учир хуулийн дагуу эрүүл мэндийн шаардлагад нь нийцсэн хоолоор хангах үүргийнхээ дагуу хоол цай өгсөн гэж АТГ-ийнхан хэлж байгаа юм.
Харин уг бичлэгийг сошиал сүлжээнд хамгийн анх хэн, хаанаас, ямар хаягаар тавьсан бэ гэдэг талаар мэдээлэл өгөх боломжгүй гэлээ.
О.НАНСАЛМАА