Нийслэлийн онцгой байдлын газраас өнөөдөр он гарснаас хойш нийслэлд тохиолдсон үер ус, гамшиг ослын талаар болон авч хэрэгжүүлсэн арга хэмжээ, дүгнэлтийн тухай мэдээлэл хийлээ. Өнгөрсөн сараас, энэ сарын сүүлийн өдрүүд ийг хүртэлх нийт ослын 399 дуудлага бүртгэгдсэнийг өмнөх онтой харьцуулахад гал түймрийн дуудлага 19.8 хувиар буурч, эрэн хайх ажиллагааны дуудлага 62.7 хувиар өссөн байна.
Нийслэлийн онцгой байдлын газрын дэд дарга Б.Мягмардорж “Долдугаар сар эхэлснээс хойш нэлээд усархаг бороо орсон. Долдугаар сарын 14-өөс эхлэн дуу цахилгаантай ширүүн бороо орсны улмаас Баянзүрх, Баянгол, Хан-Уул, Чингэлтэй дүүрэгт борооны улмаас зам дээр лаг шавар үүссэн, айл өрх, орон сууцны зоорийн давхарт ус орох гэх мэт 96 дуудлага ирсэн. Дуудлагын 80 хувьд нь заавар зөвлөгөө өгч, яаралтай туслалцаа үзүүлж ажилласан.
Өчигдрийн байдлаар Хан-Уул дүүргийн 11, 15-р хорооны орон сууцны барилгуудын доороос ус нэвчиж байна гэсэн дуудлага ирсэн. Нийтдээ 40 гаруй барилгын доороос ус нэвчсэн гэх дуудлага ирсэн байна. Тиймээс дуудлагын дагуу цаг алдалгүй ажилласнаар одоогийн байдлаар 11 орон сууцны усыг соруулж цахилгааныг хязгаарласан байгаа. Ус нэвчиж цахилгааны шит рүү хүрэх эрсдэл үүссэн учраас хязгаарласан” гэв.
Б.БУЯНЖАРГАЛ
