УИХ-ын гишүүн О.Баасанхүү өнөөдөр Төрийн ордонд мэдээлэл хийж, Ерөнхий сайд У.Хүрэлсүхэд “Эрдэнэт” үйлдвэрийн асуудлаар асуулга хүргүүлснээ дуулгалаа. Тэрбээр, тус үйлдвэрийн 51 хувийг барьцаалсан асуудлыг Лондонгийн арбитрын шүүхийн шийдвэр гарсан эсэх. Шүүхийн шийдвэртэй холбоотой нөцхөл байдлын талаар асуулга илгээсэн байна.
Асуулгад: нэгд, “Эрдэнэт” үйлдвэрийн удирдлагууд болон компанийн өмч хөрөнгө, үйл ажиллагаатай холбоотой ямар шийдвэр тус шүүхээс гаргасан. Хоёрт, Английн Лондон хотод өнгөрсөн долдугаар сард болсон арбитрын шүүх хурлаар “Эрдэнэт” үйлдвэрийн асуудал бүрэн эцэслэгдсэн эсэх. Гуравт, “Эрдэнэт” үйлдвэрийн 51 хувийг барьцаанд тавьсан этгээдүүдэд ямар арга хэмжээ авах талаар. Дөрөвт, “Эрдэнэт” үйлдвэрийг хохиролгүй болгох төлөвлөгөөний талаар мэдээлэл авахыг хүссэн байна.
Өнгөрсөн дөрөвдүгээр сард Эрдэнэт үйлдвэрийн асуудлыг судлах ажлын хэсэг байгуулагдсан. Ажлын ахлагчаар УИХ-ын гишүүн Я.Санжмятав, дэд ахлагчаар гишүүн Т.Аюурсайхан сонгогдсон. Харин О.Баасанхүү гишүүн ажлын явцыг хэр явж байгааг хаврын чуулган завсарлахаас өмнө лавлажээ. Гэтэл гишүүн Я.Санжмятав гишүүн “Ирэх долдугаар сарын зургаанд Английн Лондон хотод арбитрын шүүх болно. Хуралд Т.Аюурсайхан оролцоно. Мэдээж нааштай хариу гарна” гэж хэлжээ. Харин О.Баасанхүү гишүүний танилууд арбитрын шүүх хурлын хариу Монгол Улсад тааруу шийдвэр гаргасан гэж дуулгажээ. Тиймээс Ерөнхий сайдад өчигдөр асуулга тавьсан аж.