Өчигдөр оройн 22:00 цагийн орчимд Зам тээврийн хөгжлийн яамны газрын дарга нар нэгнийгээ хөнөөсөн байж болзошгүй хэргийн дуудлага цагдаагийн байгууллагад иржээ. Дуудлагын дагуу цагдаагийн алба хаагчид Сүхбаатар дүүргийн нэгдүгээр хороонд байрлах Зам тээврийн хөгжлийн яамны байранд очиж шалгалт хийж, ажилласан байна.
Урьдчилсан байдлаар тус яамны газрын дарга нар хувийн харилцааны улмаас хоорондоо маргалдаж, нэгнийхээ аминд хүрсэн гэсэн дүгнэлт гарчээ. Энэ талаар өнөөдөр 13:00 цагт ЦЕГ-ын хэвлэл мэдээллийн албанаас албан ёсоор мэдээлэл хийж, цахим орчинд тарж байгаа албан тушаалаа булаалцалдан нэгнийгээ хөнөөсөн гэх яриа үндэсгүй гэдгийг хэллээ.
ЗТХЯ-ны Төрийн удирдлагын газрын дарга Б.Махбал, Хяналт, үнэлгээ, дотоод аудитын газрын дарга Т.Гомбосүрэн нар өчигдөр яаман дээрээ орой болтол архидаж, хоорондоо маргалдсан бололтой. Улмаар Б.Махбал нь Т.Гомбосүрэнгийн аминд хүрчээ. Болсон хэргийн тухайд Зам тээврийн сайд Ж.Бат-Эрдэнэ тайлбар хийж, “Яаман дээрээ ийм хэрэг гарсанд харамсаж байгаагаа” хэлсэн байна. Б.Махбалд Эрүүгийн тухай хуулийн 10.1 дүгээр зүйл ангиар хэрэг үүсгэж, шалгаж эхэлжээ.
