У.Хүрэлсүхийн тэргүүлэх Засгийн газар дэнжигнэж байна. Кабинетийн гишүүн Б.Батзориг, Я.Содбаатар нар нь ЖДҮДС-аас өөрсдөдөө санхүүжилт авч, авилгын хэрэгт орооцолдсон. Засгаа аварч үлдэхийн тулд Б.Батзоригийг шахаж, шавдуулж, сайдынхаа албан тушаалаас саналаараа татгалзаж байна гэж хэлүүлсэн. Тэгснээрээ дэнжигнэх засгийн газраа аварч үлдэж чадахгүй гэж нийгэм олон дүгнэж байна.
Б.Батзоригийн араас Я.Содбаатар ч огцрох ёстой. Мөн намын, сонгуулийн шинж чанартай, улс орны хөгжлийн бодлогыг уландаа гишгэсэн төсөв боловсруулсан У.Хүрэлсүхийн Засгийн газар кабинетээрээ огцрох ёстой гэж эрүүл саруул бодолтой хүмүүс үзэж байна.
Ийм төсвийг дэмжихгүй, тиймээс Засгийн газрыг огцортол, ЖДҮДС-гаас өөрсдөдөө мөнгө хуваарилсан өндөр албан тушаалтнуудад хариуцлага тооцтол УИХ-ын чуулганы үйл ажиллагаанд оролцохоос татгалзаж буйгаа АН-ын гишүүд илэрхийлсэн. Тэгвэл УИХ-ын гишүүн Б.Батзоригийг ЖДҮДС-ийн үйл ажиллагаатай холбогдуулан хуулийн байгууллагаас шалгах болсон байна. Тиймээс УИХ-ын гишүүн Б.Батзоригийн халдашгүй бүрэн эрхийг нь цуцалж, УИХ-ын гишүүнээс нь түдгэлзүүлэх хүсэлтийг Прокурорын газраас УИХ-ын даргад хаяглан ирүүлсэн байна. Хариуг 48 цагт багтаан өгөх хуультай учир МАН-ын бүлэг нэн даруй хуралдах болжээ.
Ц.ХИШГЭЭ
