Сонгууль дөхөхөөр л С.Зоригийн хэргийг барьж авцгаадаг уламжлал тогтжээ. Холбогддог хэдэн хүн бий, үүгээр нь сенсаацалдаг бас нэг хэсэг бий. 2004 оны сонгуулиар гэхэд ЦЕГ-ын дарга асан, хурандаа Д.Мөрөн "Би сонгогдвол, маргааш энэ хэрэг ил болно" гэж сурталчилгаа хийгээд сонгогдож байсан. Сонгогдоод л энэ хэрэг замхарсан.
Энэ маягаар сонгууль бүхэнд С.Зоригийн хэрэг анхаарлын төвд орж ирсэн түүхтэй. 2016 оны сонгуульд ч С.Зоригийн хэрэг бас л онцгой үүрэг гүйцэтгэх төлөвтэй. Эрдэнэтээс хоёр хүнийг баривчилсан. Дараа нь С.Зоригийн бэлэвсэн эхнэр Б.Булганыг барьж хорьсон. Хэрэг бараг "илэрсэн" гэж хэлэх, зарлах цагаа хүлээж байна гэж ил далд шуугих боллоо. Ш.Отгонбилэгийн хүү, УИХ-ын гишүүн О.Содбилэг аавыг минь энэ хэрэгт хамаатуулах гэж байна гэж эсэргүүцлээ илэрхийлээд амжсан. Ийм л байдал өрнөж байна, одоохондоо.
Зоригийн бэлэвсэн эхнэр Б.Булганыг Төв аймгийн цагдан хорих ангид хорьж байгаад 461-р ангид шилжүүлэн гурав дахь сардаа хорьж байна. Тус ангид хоригдож буй цорын ганц эмэгтэй нь Б.Булган ажээ. Түүнийг үг хэлэх, өргөдөл гомдол гаргах, шударга шүүхээр шүүлгэх, өмгөөлүүлэх зэрэг Үндсэн хуулиар олгогдсон нэг ч эрхээ эдэлж чадахгүй байна гэж, түүнийг шоронд нь эргэж очсон Ц.Оюунгэрэл гишүүн дурдлаа. Б.Булган "Би энэ хэргийг зохион байгуулаагүй, хийгээгүй, захиалаагүй" гэж түүнийг эргэсэн, түүнтэй уулзсан цорын ганц хүн болох Ц.Оюунгэрэлд сэтгэлээ уудалжээ. Булганыг 2016 сонгуульд гол хөзөр болгохоор бэлдэж байна гэсэн яриа хэр үнэн болохыг удахгүй мэдэх цаг ирнэ. Тэр болтол Б.Булган маш хүнд дарамтан дор хоригдох нь ойлгомжтой болжээ.
Тоймч Д.ГАНТУЛГА
