Өнөөдөр буюу гуравдугаар сарын 14-ны өдөр “Оросын боловсролын үзэсгэлэн-2019” сэдэвт хэвлэлийн бага хурал боллоо. Хуралд Россотрудничество агентлагийн Монгол улс дахь төлөөлөгчийн газрын тэргүүн Татьяна Будаева, ОХУ-аас Монгол Улсад суугаа элчин сайдын яамны төлөөлөгч болон Оросын тэргүүлэх 36 их дээд сургуулиудын төлөөлөгчид оролцлоо.
Оросын боловсролын үзэсгэлэн өнөөдөр 15:00 цагаас Оросын шинжлэх ухаан соёлын төвд нээлтээ хийх бөгөөд мастер хичээл явагдаж мөн их дээд сургуулиудын төлөөлөгчид сургуулийн суралцах орчин, дотуур байр, чөлөөт цагаа өнгөрөөх боломжуудын талаар эцэг эх, сурагчдад дэлгэрэнгүй мэдээллийг өгөх юм.
Мөн түүнчлэн үзэсгэлэнгийн үеэр сугалаа явуулж Оросын шинжлэх ухаан соёлын төвийн дэргэдэх орос хэлний дамжаанд үнэ төлбөргүй суралцах нэр бүхий гэрчилгээг гардуулах юм байна.
Харин маргааш буюу 3 дугаар сарын 15-ны 17:00 цагт Russia Study сайтын онлайн бүртгэл дуусах бөгөөд 3 дугаар сарын 18-22-ны хооронд тэтгэлгээр суралцах элсэлтийн шалгалтууд явагдаж эхлэнэ.
Техникийн чиглэлээр суралцахаар горилогчид математик болон орос хэлний хичээлээр,анагаах ухааны чиглэлээр суралцахаар шалгалт өгөх сурагчид хими болон орос хэлний шалгалт өгөх юм байна.
Монголд одоогоор ОХУ-ын их дээд сургууль төгссөн 60 мянга гаруй хүн ажиллаж байна. ОХУ Монгол улсын боловсролын салбар дахь хамтын ажиллагаа жилээс жилд өргөжиж байгаа нь Монголд хуваарилагдаж байгаа хуваарийн тооноос шууд хамаарагдаж байна.
Өмнө нь 200 хүрэхгүй хуваарь Монголд ирдэг байсан бол 2018-2019 онд 500 хуваарь ирсэн байна. Мөн Орос орон Монголын найрсаг хөршийн харилцаатай учир Монголын оюутнуудыг найрсаг дотно хүлээж авдаг гэдгээ Оросын Холбооны улсаас Монголд Улсад суугаа элчин сайдын яамны төлөөлөгч хэлж байлаа.
З.НУРЖАН