Сүүлийн үед залилах төрлийн гэмт хэрэг өссөн үзүүлэлттэй байгаа. Тэр дундаа Япон, Солонгос, Австрали, Швед, АНУ-д ажилд оруулж өгнө гэж хуурч мэхлэх тохиолдол нэмэгджээ. Залилан мэхлэх төрлийн хэрэг янз бүрээр үйлдэгдэж байгааг цагдаагийн байгууллага сануулсаар байгаа ч иргэд хохирсоор...
Хамгийн сүүлийн мэдээгээр түрээсийн үйлчилгээ үзүүлдэг газруудаас үнэтэй буюу Lexus570, Range rover, Benz зэрэг авто машиныг өдрөөр нь түрээслэн авч яваад банк бус дээр тавьж залилан үйлддэг этгээдүүдийг баривчилсан байна.
Фэйсбүүк болон бусад зараас задалсан дахин ашиглахгүй болсон тээврийн хэрэгслийн арлын дугаар, гэрчилгээ улсын дугаарыг 1-10 сая төгрөгөөр худалдан авч ижил төстэй авто машинд зүүж арлын дугаарыг өөрчлөн банк бус, санхүүгийн байгууллага болон барьцаалан зээлдүүлэх газруудад 5-35 сая төгрөгөөр тавьж байсныг илрүүллээ.
Эдгээр залуус 26-28 насных бөгөөд тодорхой ажил мэргэжилгүй, тогтсон ажилгүй залуучууд байгаа нь цагдаагийн байгууллагын анхаарлыг татаж байна.
