Баянзүрх дүүргийн цагдаагийн хоёрдугаар хэлтсийн алба хаагчид, цагдаагийн алба хаагчийн албаны үнэмлэх болон энгэрийн тэмдэг хуурамчаар үйлдэн ашиглаж иргэдийг хууран мэхэлж байсан "А" гэгч этгээдийг саатуулжээ.
Иргэн "А"-г Монгол Улсын Эрүүгийн хуулийн тусгай ангийн 23.2 дугаар зүйлийн 1 дэх хэсэгт зааснаар хэрэг бүртгэлтийн хэрэг нээж, мөрдөн шалгах ажиллагаа эхлүүлсэн байна.
Иргэн "А"-г хэрэгт холбогдуулан шалгахад тэрээр 3 найзын хамт уг хэргийг хийсэн бөгөөд дээрх этгээдүүд нь гадуур явахдаа байнга цагдаагийн алба хаагчийн дүрэмт хувцастай, үнэмлэхтэй, энгэрийн тэмдэгтэй явдаг байсан бөгөөд шөнийн цагаар бусдыг хууран мэхэлж, айлган сүрдүүлдэг байжээ.
Мөрдөн шалгах ажиллагааны явцад иргэн "А" нь 2015 оноос хойш, мөн хамтран хэрэг үйлдэгч 3 этгээдийн хамтаар 2017 оноос хойш цагдаагийн алба хаагчийн дүрд тоглож эхэлсэн нь тогтоогджээ.
Эдгээр этгээдүүд нь цагдаагийн алба хаагчийн тусгай хэрэгсэл, тусгай дуут дохио, цагдаагийн алба хаагчийн дүрэмт хувцастай цагдаагийн алба хаагчаас огтхон ч ялгарахааргүй болж иргэдийг залилан мэхэлж байсныг шалгалтын явцад тогтоосон байна.
Цагдаагийн алба хаагч иргэн танд цол, нэр албан тушаалаа хэлэхгүйгээр нэгжлэг хийх, торгуулийн тасалбаргүйгээр торгох, шан харамж нэхсэн, хууль бус шаардлага тавибал цагдаагийн байгууллагын 102 тусгай дугаарын утас, цагдаагийн алба хаагчтай холбоотой гомдол мэдээлэл хүлээн авах 126 дугаарын утас болон 94945490 дугаарын утсанд хандахыг зөвлөж байна.
Мөн сэжигтэй тохиолдол ажиглагдвал цагдаагийн байгууллагад хандаж хамтран ажиллана уу.
БЗД Цагдаагийн 2-р хэлтэс
