Монгол улс болзошгүй гамшигт бэлэн биш байгаа нь өнөөдрийн цугларалтаас харагдлаа. Ард иргэддээ мэдээллээ цогц хүргэж чадсангүй, тэдэнд мэдээлэл маш дутмаг байгаагаас үүдээд зөвхөн тамга даруулахаар өөрсдийн очих ёстой цэгтээ цугларчээ.
Цагдаа, онцгой байдлын газар болон хорооноос хүмүүс байсан ч тодорхой хэмжээний сургалт зөвлөмж явуулалгүй тарааж байсан нь хэд хэдэн цугларах цэг дээр ажиглагдлаа.
Очсон хүмүүсийг харвал тэтгэврийн хөгшчүүл хүүхдүүд багачууд олноор цугларжээ. Харин ч томчууд биднээс илүү хүүхдүүд гамшиг тохиолдвол яаж урьдчилан сэргийлэх тал дээр илүү мэдлэг мэдээлэлтэй байлаа. Энэ бол мэдээж сургалт явуулсан бодит үр дүн биз.
Цугларах хэсэг дээр ирсэн хүмүүсийн хүйсийн байдлыг харвал ид ажил хөдөлмөр хийх насны хамаг залуус маань хаачив гэсэн бодол төрж байсан нь нууц биш юм.
Мэдээж энэ бүх дадлага сургуулийн зорилго нь иргэдэд тохиолдож болзошгүй аюул, осол, гамшигт өөрийгөө болон гэр бүлээ авран хамгаалах мэдлэг, дадлыг олгоход чиглэгдэж байгаа. Аюулгүй талбайдаа ямартай ч иргэдийн 60-70 хувь цугларсан байхыг хараад баярлаж байсныг нуух юун. Газар битгий хөдлөөсэй, гамшиг битгий тохиолдоосой...
Дараа дараагийн дадлага сургуульд илүү тодорхой мэдээ мэдээлэл, сургалт зохион байгуулах шаардлагатай байгааг энд онцлоё.
Ц.ХИШГЭЭ