Жавхлан бол дуучин. Тэр Украйны ерөнхийлөгч Зеленскийн адил сонгогдсон. Нэгдүгээрт, тэр олны танил. Хоёрдугаарт, сайн дуучин. Гэхдээ түүнийг улс төрчийн хувьд биш, улс төрийн тогтолцоог эсэргүүцсэндээ сонгосон гэдэг. Ард иргэдийн санааг зовоож буй улс орны тусгаар тогтнол, газар шороо, бие даасан байдлыг л ярьж хэлж байсан учраас сонгогчид түүнийг сонгосон.
Гэтэл тэр УИХ-д сонгогдсоноос хойш гудамжинд ярьж байснаасаа огт хэтрээгүй, илүүг хийгээгүй. Тэр зүгээр л ярьснаа л үргэлжлүүлсэн. Хууль хэлэлцэх гол асуудалд ч олигтой санаа нэмэрлэдэггүй, хуралдаа ч ирж, оролцох нь ховор ийм л нэг гишүүн болсон.
Тэгтэл түүнийг Санта Марал Сангийн 2019 оны 4-р сарын судалгаагаар мөн л Монголын топ-10 улс төрчөөр сүүлийн жилүүдэд нэрлэсэн нь сонин санагдав. Энэ тухай, тус сангийн захирал, судлаач Суматигаас тодруулбал, - Бид өөрсдөө нэр дэвшүүлдэггүй. Харин судалгаанд хамрагдаж буй хүмүүсээс гурван улс төрчийн л нэрийг нэрлэхийг хүсдэг.
Ийм санал асуулгыг орон даяар өрнүүлдэг. Иргэдээс хамгийн олон нэрлэсэн 10 улс төрчийг Топ-10 улс төрч гэж гаргадаг. Өөрөөр хэлбэл энэ 10 улс төрчөөс иргэд их зүйлийг хүлээж байна гэж ойлгож болно гэж тэрбээр хариуллаа. Тэгэхээр Жавхлан бол Монголын иргэдийн хамгийн сайн мэдэх УИХ-ын гишүүн мөн юм байна. Гэхдээ л миний хувьд, С.Жавхлан хамгийн нөлөө бүхий 10 улс төрчийн нэг гэдэгтэй санаа нийлж чадахгүй.
О.НОМИН
