Намууд бие биеэ тандаж түншиж эхэллээ гэж ажиглагчид харж байна. МАХН-ын ажлын хэсгийн ахлагч Ч.Улаан, МАН-ын ажлын хэсгийн төлөөлөгч Ч.Хүрэлбаатар нарын мэдээлэл энэ хоёр нам эвсэж орох гэж байгаа юм гэдэг ам дамжсан яриаг баталгаажуулсан.
Угшил нэгтэй хоёр намын хооронд ямар тохиролцоо хийгдэв ? гэдгийг үзвэл, хоёр даргатай байх заалт оржээ. Эвслийн тэргүүн нь МАН-ын дарга М.Энхболд. ТУЗ-ын дарга нь МАХН-ын дарга Н.Энхбаяр. Удирдах зөвлөлийг хоёр талаасаа тэнцүү тоотой гишүүдээс бүрдүүлэх заалт оруулсан байна. Эвслийг төлөөлж М.Энхболд гэрээ хэлэлцээр хийх бол, эвслийн дотоод асуудлыг ТУЗ-ын дарга Н.Энхбаяр толгойлон шийдэх болж байна гэж харж болно. Гэрээ нь 4 жилийн хугацаанд хүчинтэй байх заалт орсон нь, 2017 оны Ерөнхийлөгчийн сонгуульд хүч хамтарна гэж ойлгогдоно.
Хувь хүмүүсийн өөр хоорондын зөрчлөө умартаж, улс орны эрх ашгийн төлөө нэгдлээ гэж нийгэмд үзэх хүмүүс байна. Гэвч энэ тохиролцоо бол зөвхөн эхний алхам гэдгийг Ч.Улаан сануулахаа мартсангүй. Зөвхөн ажлын хэсгийн хүрээнд эвсэх тохиролцоонд хүрсэн. Түүнийг аль аль намынх нь удирдах зөвлөлөөр хэлэлцэж, бага хурлаараа баталгаажуулах ёстой. Хэрвээ баталгаажвал, дараагийн гэрээг ч үзэглэх шаардлагатай.
МАН-ын бага хурлаар эвсэх асуудлыг ярилцаагүй. МАХН-ын бага хурлын шийдвэрийг харзнах болсон гэсэн мэдээлэл байна. Өнөөдөр МАХН бага хурлаа хийнэ. МАХН-ын хувьд хэд хэдэн хувилбар байгаа. МАН-тай эвсэхээс гадна, АН-тай хамтрах ч санал бас хүлээгдэж буй. МАХН-ын дарга Н.Энхбаярын хувьд МАН-тай эвсэх нь намаа залгиулчих магадлалтай гэсэн болгоомжлол байхыг ажиглагчид үгүйсгэхгүй байна. Тиймээс намууд бие биеэ тандаж, түншиж байна. Намуудын атом, молекулын нэгдэх, салах хөдөлгөөн МАХН-ын гаргах шийдвэрээс ихээхэн хамааралтай болохыг шинжээчид хэлж байна.
Нийтлэлч Ц.ЭНХБАТ
