Ялалт байгуулах бол сонгуулийн төгсгөл. Ялалт байгуулахын тулд намаасаа улс төрийн дэмжлэг авч, сонгуульд нэр дэвших эрхээ олж авах ёстой. Чадвал, Амарбаясгалан шиг тойргоо өөрөө сонгох хэрэгтэй. Дэвшиж байж л сонгуульд өрсөлдөнө. Тиймээс нам доторхи тойрог булаацалдах нь хамгийн хүнд хэцүү өрсөлдөөн болдог гэж улс төрчид дүгнэдэг.
Нам доторхи зодооны эхлэл тавигдсаныг Амарбаясгалан, Раднаасэдийн хэвлэлээр бие биенээ турхирсан өдөөн хатгалт, эцэст нь, МАН-ын Хяналтын хорооны мэдэгдлээс ажиглаж болно. -Раднаасэдэд МАН улс төрийн дэмжлэг үзүүлэхгүй. 2020 онд түүнийг МАН-аас УИХ-д дэвшүүлэхгүй гэдэг МАН-ын Хяналтын хорооны шийдвэрийг Батбаатар олон нийтэд мэдээллээ.
.jpg)
Өөрөөр хэлбэл, энэ мэдээлэл нь Говь-Алтайчууд, Раднаасэдийг 2016 онд сонгосон сонгогчдод хандсан чанартай мэдээлэл боллоо. Дээр нь, МАН-ын дарга, Монгол улсын ерөнхий сайд У.Хүрэлсүх Говь-Алтай аймгийн иргэдтэй уулзаж, аймгийн төвд 54 км цэвэр усны хоолой татаж өгөх ажлыг эхлүүлэхээ зарлалаа.
Ерөнхий сайдыг Говь-Алтайн аймагт томилолтоор ажиллахад МАН-ын ерөнхий нарийн бичгийн дарга Амарбаясгалан дагалдаж явсан нь сонирхлын зөрчил дагуулах магадлалтай. Амарбаясгалан нь, 2018 оны сүүлчээс эхлэн Говь-Алтай аймагт удаа дараа томилолтоор ажиллаж, тэднээс УИХ-ын сонгуульд нэр дэвших санаа өвөрлөж, "Төрөлх Алтай" ТББ байгуулж, түүгээрээ дамжуулан том сүлжээ үүсгэсэн тухай Control.mn өмнө нь мэдээлж байсан.
Тэгвэл энэ бүх мэдээлэл өнөөдөр үнэн болох нь тодорч байна. Тэрбээр гол өрсөлдөгч болох Раднаасэдийг "мөргөж", Говь-Алтайн ганц тойргийг түүнээс ийнхүү булаан авлаа.
- УИХ-ын гишүүн санаачилга гаргасны төлөө Намын хяналтын хорооноос гишүүндээ шийтгэл оноох, хариуцлага хүлээлгэж болох уу? Раднаасэдээс тойрог булааж авч болно. Гэхдээ намын байгууллага төрийн институци рүү халддаг байж болно гэж үү? МАН-аас 5 жилийн хугацаанд улс төрийн дэмжлэг авахгүй болсноо дуулсан, МАН-ын боловсролтой, мэдлэг, чадвартай цөөн гишүүний нэг Раднаасэд ингэж хариу мэдэгдлээ.
Ц.ХИШГЭЭ
