Өнөөдөр буюу /2019.06.18/-нд СХД-ийн АН-ын гишүүдийн зүгээс С.Эрдэнийг огцруулах олон үндэслэл, шалтгаанууд байгаа талаар мэдээлэл хийлээ.
"АН-ын удирдлагууд буруу бодлого шийдвэр гаргаснаас болж намын ирээдүйд сөргөөр нөлөөлж байна. 06 сарын өмнө 20 хувьтай байсан намын рейтинг өнөөдөр 7 хувь болтлоо буурсан. Цаашид энэ янзаараа байвал улам л дордох шинжтэй байгаа учраас С.Эрдэнэ даргыг огцруулах хангалттай үндэслэл байна" гэж СХД-ийн АН-ын гишүүд дэмжигчид хэллээ.
Мөн СХД-ийн АН-ын гишүүн Э.Бямбацэрэн хэлэхдээ “Аймаг, дүүргийн намын дунд шатны байгууллага руу С.Эрдэнэ дарга өөрийн төлөөний хүмүүсийг тавьснаар намууд дотроо хуваагдаж байна. Жишээвэл өөрийн төлөөний хүн болох Н.Батцогтыг СХД-ийн АН-ын даргаар тавьсан. Мөн намын гишүүд дэмжээгүй байхад өөрөө дур мэдэн шинээр дарга томилдог. СХД-ийн АН-ын гишүүд С.Эрдэнэ даргыг өргөдлөө өгч огцрохыг шаардаж байна” гэлээ.
СХД-ийн АН-ын гишүүн Э.Гэрэлмаа хэлэхдээ “30 жилийн түүхтэй Ардчилсан нам нь МУ-д ардчилсан хувьсгалыг бий болгож томоохон өөрчлөлтийг авчирч чадсан. Ардчилсан намаас олон дарга сонгогдож байсан ч өмнө нь ийм шударга бус хувиа хичээсэн дарга байсан удаагүй. Бид шударга ёсыг эрхэмлэдэг гишүүд дэмжигчид. Тиймээс шударга бус үйлдлийг таслан зогсооцгооё гэж уриалж байна” гэж мэдэгдлээ.
С.Эрдэнэ даргыг ажил үүргээ хувийн эрх ашигт урвуулан ашиглаж, намын нэр хүндэд сөргөөр нөлөөлж байна гэж үзэн өргөдлөө өгч огцрохыг СХД-ийн АН-ын гишүүд шаардлаа .
М.ОЮУНЦЭЦЭГ