Үндэсний шигшээ багийн тамирчдад ийм асуудал тохиолдсон юм билээ. Дасгалжуулагчид тухайн тамирчнаар өөрийн дур хүслээ гүйцэлдүүлэхийн тулд янз бүрийн саналууд тавьдаг байж. Өөртэй нь дотно харьцаанд орохгүй бол тэмцээн уралдаанд явуулахгүй байх, хээрийн бэлтгэл, гадагшаа дотогшоо тэмцээн уралдаанд явах үеэр нэг дор байрлаж, далимдуулах, шигшээ багаас хасахаар сүрдүүлэх, "Чи ерөөсөө болохгүй байна. Гэхдээ надтай ойртвол дасгалжуулагч нь зохицуулаад өгье" гэх мэтээр өөрт байгаа эрх хэмжээ, тамирчдын амжилт гаргах эрмэлзлэлийг ашиглаж, барьцаалсан байдлаар дарамталсан байна. Мэх заах, өргөлтийн техник заах нэрийдлээр тамирчдын эмзэг газарт нь давтамжтай хүрэх тохиолдлууд байжээ. Тавьсан саналыг нь хүлээн авахгүй бол тэмцээн уралдаанд явж чадахгүй, шигшээ багаасаа хасагдах болов уу? Гэдэг айдас тамирчдад төрдөг байна.
"Засгийн Газрын мэдээ" сониноос ишлэв
