Сонгууль болоход хоёрхон сар дутуу байхад Үндсэн хуулийн цэц Сонгуулийн тухай хуулийг Үндсэн хууль зөрчсөн хэмээн үзсэн нь гацааг үүсгээд бий. Харин УИХ дахь намын бүлгүүд хуралдаж, Үндсэн хуулийн цэцийн дүгнэлтийг хүлээж авахаар болсон байна. Намын жагсаалтаар гарахаа болих бол мажоритар тогтолцоог сонгохдоо тойрог, мандатыг хэрхэн хуваарилах вэ гэдэг дээр талууд одоо ид толгойгоо гашилгаж байна. Намын бүлгүүд Цэцийн дүгнэлтээс хойш хэлэлцэж эхэлсэн бөгөөд эх сурвалжийн мэдээлснээр эхний байдлаар жижиг 76 тойргийг сонгохоор урьдчилан тохиролцоод байгаа аж.
Ингэхдээ жагсаалтын 28-ыг жижиг 76 тойрогт хуваах бөгөөд нийслэл болон орон нутагт адил тэнцүү 14, 14-өөр хуваах хувилбар яригдаж байгаа гэнэ. МАН-ынхан өчигдрийн бүлгийн хуралдаанаараа тойргийн тоог өөрчлөхгүйгээр нийслэлд 8, орон нутагт 20 мандатыг хуваарилах ёстой гэжээ. Харин АН-ын бүлгийн хуралдаанд оролцсон гишүүдийн олонх нь жижиг 76 тойрог бүхий мажоритар хувилбарт шилжих ёстой гэж үзэж байгаа юм байна.
Х. АЯЛГУУ
