Энэ оны нэгдүгээр сарын 22-ны өдөр Дорноговь аймгийн Зүүнбаян дахь зэвсэгт хүчний 336-р ангид байлдагч А амь насаа алдсан харамсалтай хэрэг гарсан. Тус ангийн Мотобуудлагын батальоны танкийн ротын захирагч асан А.Энхбаяр, тус ротын 1-р салааны механик жолоочоор ажиллаж байсан Р.Вандлхангаа, байлдагч П.Бадамсамбуу нар алба хааж байсан 19 настай байлдагч А-г “гар утас хэрэглэсэн” гэх шалтгаанаар дэглэж, хөнжил пүүгээг нь үүрүүлэн хүйтэн цаснаар гадаа гүйлгэж, галуун цуваагаар шалдан алхуулсан буюу дүрмийн бус шийтгэл оногдуулсан нь түүний үхлийн шалтгаан болсон гэж шүүхээс үзсэн. Улмаар Говьсүмбэр аймаг дахь Сум дундын эрүүгийн хэргийн анхан шатны шүүхээс А.Энхбаяр, Р.Вандхангаа нарт 4-5 жил, П.Бадамсамбууд зургаан сар хорих ял оноосон билээ. Харин Говьсүмбэр аймаг дахь Эрүү, Иргэний хэргийн давж заалдах шатны шүүхээс тэдэнд оноосон ялд өөрчлөлт оруулж, А.Энхбаярыг гурав, Р.Вандлхангааг гурван жил зургаан сар хорихоор магадлалд дурьдсан бол П.Бадамсамбууг ялаас сөлөөлж, нэн даруй суллахаар шийдвэрлэсэн байна.
Т.Х
