Тэтгэврийн зээлийг тэглэх хуулийн төслийг УИХ-д өргөн мэдүүлсэнтэй холбогдуулан Монголын ахмадын холбооноос хэвлэлийн бага хурал хийж, байр сууриа илэрхийллээ. Ахмадуудын тухайд эл асуудал сайшаалтай, төр засагтаа баярлаж байгаа хэдий ч ахмадуудын дунд талцал, бухимдал үүсээд байна гэв. Учир нь байгалийн баялгийн мөнгөөр тэтгэврийн зээлийг тэглэх гэж байгаа бол нийт ахмад настнууддаа хүртээмжтэй байх хэрэгтэй. Монголын ахмадын холбоо уг асуудлыг буруу гэж үзэхгүй байгаа ч нийт ахмадынхаа нийтлэг, эрх, хууль ёсны ашиг сонирхлыг харж үзэх хэрэгтэй. Өнөөдрийн байдлаар тэтгэврийн зээлтэй ахмадуудын 97 хувь нь 6 сая хүртэлх зээлтэй бол үлдсэн хувь нь 10-30 сая төгрөгийн зээлтэй байна. Ахмадуудаас дээрх олон сая төгрөгийн зээлтэй ахмадуудын зээлийг бүгдийг төлөх нь шударга бус байна. Зээл аваагүй ахмадуудыг хохироохгүй тулд тэтгэврийн зөрүүг арилгах хэрэгтэй. Тэтгэвэр нь хүрэхгүй байна гэхээс илүү зээлийн өндөр хүүд дарлуулдаг тул тэтгэврийн зээлийн хүүг бууруулж, цаашид олон сараар биш 3 сараар олгох хэрэгтэй гэж үзэж байна хэмээлээ.
О.Гоо-Оюун
