Монгол ноолуурыг бэлтгэх үйл явцтай холбоотой энэ оны нэгдүгээр сарын 7-ны өдөр “PETA Asia” сошиал хуудсанд дуучин К.Номинжин Монголд ноолуур бэлтгэхээр ямааг хэрхэн тарчлан зовоож буй тухайд сэтгэл шаналж буйгаа илэрхийлсэн видеог монгол хэл дээр хөрвүүлэн түгээсэн. Энэ нь олон хүний дургүйцлийг хүргэсэн бөгөөд монгол ноолуурыг үнэгүйдүүлэх нэгээхэн шалтгаан болж байна хэмээн иргэд үзэж байна. Уг асуудлын хүрээнд “Энэ бичлэг өнгөрсөн оны гуравдугаар сард гарсан. Энэ бол олон давтамжтайгаар дэлхий нийтэд цацагдаж байгаа. Уг асуудлаас болоод манай Англи, Итали, Герман харилцагч компаниуд гомдол тавиад “Та нар малаа яаж самнадаг юм бэ. Ямар учраас ийм бичлэг яваад байгаа юм бэ” хэмээн Монголд ирж малчны хотхонд очиж ямаа самнахыг хараад танай улс үнэхээр тамладаггүй юм байна гэдгийг мэдсэн. Ноолуур нь ургаад халуу шатсан үед уламжлалт аргаар самнаж авдаг юм байна гэдгийг мэдэж авсан. Малчдын хувьд хүүхдээсээ илүү малаа хайрлаж, таван хошуу малынхаа үржил шимээр амьдардаг. К.Номинжингийн бичлэгийн хувьд зориуд хятадуудтай хамтран санаатайгаар ингэж хийсэн байна лээ. Цагаан ямааны хувьд монгол ямаа биш. Цус, нөжийг нь гоожуулаад хоолойг нь огтолж байгаа бичлэгийг албаар эвлүүлсэн бичлэг байсан. Малчид маань бол малаа ингэж тамлан зовоодоггүй” хэмээн “Хан богд” ХХК-ийн гүйцэтгэх захирал Ч.Ганцэцэг мэдээллэсэн. Түүнчлэн Германд “Цуст ноолуур” гэсэн гарчигтай мэдээлэл цацагдсан. Үүнээс болоод харилцагч байгууллагууд болон худалдан борлуулдаг дэлгүүрээс гомдол ирсэн. Тиймээс энэ асуудалд Гадаад харилцааны яам, Хүнс хөдөө аж ахуй хөнгөн үйлдвэрийн яамнаас олон улсад залруулга гаргах ёстой хэмээн иргэд болон үйлдвэрлэл эрхлэгч нар үзэж байна.
Э.Сувдаа
