Өнөөдөр “Оюутолгой” төслийн туслан гүйцэтгэгч “SSM” компаниас халагдсан ажилтнууд болон үйлдвэрчний эвлэлийн байгууллагаас тус компанийн хууль бус ажил халалт, ажилчдад үзүүлдэг дарамт шахалтыг эсэргүүцэн шаардах бичиг хүргүүлэхээ мэдэгдлээ. “SSM” компани нь 2014 онд “Оюутолгой” компанийн үйлчилгээний тендэрт ялсан бөгөөд хоол үйлдвэрлэл, оффис цэвэрлэгээ, ус түгээлт гэх үйлчилгээ явуулдаг компани юм байна.
Үйлдвэрчний эвлэлийн төлөөлөгчид: “Дөнгөж ажилд орсон хүнийн нөөцийн менежер олон жил ажилласан, туршлагатай ажилчныг ямар ч зөрчил гаргаагүй байхад нь ажлаас халсан. Өвчтэй, чөлөөтэй байсан ажилчдыг ч чөлөөний хугацаа нь дуусаагүй байхад халсан тохиолдол ч гарсан. Энэ мэтчилэн эрх мэдлээ ашиглан хамаатан саднаа ажилд авч, зохион байгуулалттайгаар баримт үйлдэн олон жил ажилласан ажилчдыг халж байна, үүний эсрэг бид тэмцэнэ” гэсэн юм.
Үйлдвэрчний эвлэлийн хорооны дарга: “Оюутолгой компани хүний эрхийн төлөө үг хэлж дуугарсан бүхий л үйл ажиллагааг хорьдог. “Цалин бага, ажиллах нөхцөл муу, ажлын дарамт шахалт их байна” гэж эрхээ хамгаалж дуугарсан хэн бүхнийг ажлаас халж байгаа нь шударга бус байна” гэсэн юм.
Э.Сувдаа