Зөвхөн Солонгос улс руу цутгах бэлэн мөнгөний 2 том урсгал бий болжээ. Нэгд, аялал жуулчлал буюу Казинод тушаах мөнгө. Монголчууд Солонгосын Казинод ихээхэн хэмжээний бэлэн мөнгийг тушаадаг. Одоогоос 5-6 жилийн өмнө гэхэд л, Казинод тоглодог мөнгөний хэмжээгээрээ Монголчууд эхний 5 байрыг эзэлдэг байсан гэх мэдээлэл цацагдсан. Энэ бол их хэмжээний мөнгө. Түүний дараа, эмчилгээ, гоо сайхандаа зарцуулах мөнгө. УИХ -ын гишүүн С.Одонтуяа 60 сая ам.доллар гадагшаа эмчилгээнд зардаг гэсэн тоог гаргаж ирлээ. Үнэн байх. Монголчуудад зориулсан эрүүл мэндийг бизнесийг солонгосчууд цэцэглүүлсэн. Солонгосыг зорин эмчилгээ хийлгэж буй хүний тоо, зарцуулж буй мөнгөний дүнгээрээ Монголчууд бусдыг хол орхисон гэдэг мэдээллийг солонгосчууд өөрсдөө өгдөг. Өөр бусад олон урсгал бий болсон.
Монголчууд бид хий хоосон эх оронч гэж ярихаас цаашгүй болжээ. Хэдийгээр хувь хүмүүс өөрсдийнхөө мөнгө хөрөнгийг дур мэдэн зарцуулж байгаа ч, энэ бол Монголын баялаг гэдгийг бас умартаж болохгүй гэж санагдана. Эрүүл мэндийн шинэ хуулиар энэ мөнгөний урсгалыг хяналтандаа авч, гадагшаа цутгах баялгийг эх нутагтаа үлдээх нөхцөлийг бий болгож чадваас улс орон, ард иргэдэд бага ч гэсэн тустай эх оронч үйлс болох нь дамжиггүй ээ.
Ц.БАТТУЯА
